തിരുവനന്തപുരം: വര്‍ഗീയതയ്‌ക്കെതിരെ എന്ന പേരില്‍ ഡിവൈഎഫ്ഐ ഹലാല്‍ ഫുഡ്‌സ്ട്രീറ്റ് നടത്തിയതിനെതിരെ പരിഹാസവുമായി യുക്തിവാദികള്‍. ‘എന്റെ പൊന്ന് മക്കളെ, ഭക്ഷണത്തില്‍ ആരും മതം കലര്‍ത്തരുതേ’ എന്ന അടിക്കുറിപ്പോടെ ഹലാല്‍ ഭക്ഷണം കഴിക്കുന്ന നേതാക്കളുടെ ചിത്രങ്ങള്‍ പങ്കുവെച്ചാണ് പരിഹാസം.
ഫുഡ് സ്ട്രീറ്റ് പ്രതിഷേധത്തെ പരിഹസിച്ച് നടന്‍ ഹരീഷ് പേരടിയും രംഗത്തുവന്നിരുന്നു. ക്രിസ്ത്യന്‍ ഭൂരിപക്ഷ പ്രദേശമായ എറണാകുളത്ത് പന്നി വിളമ്പിയവര്‍ മലപ്പുറത്ത് പന്നി വിളമ്പിയോയെന്ന് അദ്ദേഹം ചോദിച്ചു. ഫോട്ടോഷോപ്പ് അല്ലാതെയുള്ള ചിത്രം അയച്ചാല്‍ തന്റെ വാക്കുകള്‍ പിന്‍വലിക്കാമെന്നും അദ്ദേഹം പറഞ്ഞു.
ഹരീഷ് പേരടിയുടെ വാക്കുകള്‍: ”ഡിവൈഎഫ്‌ഐയോട് ഒരു ചോദ്യം. മലപ്പുറത്ത് പന്നി വിളമ്പിയോ? ക്രിസ്ത്യന്‍ ഭൂരിപക്ഷ പ്രദേശമായ എറണാകുളത്തെ ഫോട്ടോ കണ്ടു. മുസ്ലിം ഭൂരിപക്ഷ പ്രദേശമായ മലപ്പുറത്തെ ഒരു ഫോട്ടോയും ഡിവൈഎഫ്‌ഐയുടെ മലപ്പുറം പേജില്‍ പോലും കണ്ടില്ല. മലപ്പുറത്ത് പന്നി വിളമ്പിയിട്ടുണ്ടെങ്കില്‍ നിങ്ങള്‍ ഡിവൈഎഫ്ഐ ആണ്. അല്ലെങ്കില്‍ വെറും ഡിങ്കോളാഫികളാണ്. മലപ്പുറത്തെ ഫോട്ടോഷോപ്പല്ലാത്ത ഒര്‍ജിനല്‍ ഫോട്ടോ അയച്ച് തന്നാല്‍ ഈ പോസ്റ്റ് പിന്‍വലിക്കുന്നതാണ്. ലാല്‍ സലാം”.
ഫുഡ്‌സ്ട്രീറ്റില്‍ പന്നിയിറച്ചി വിളമ്പുമോ എന്ന ചോദ്യം ഉന്നയിച്ച് ദ എത്തിസ്റ്റ് കൂട്ടായ്മാ നേരത്തേ രംഗത്തുവന്നിരുന്നു.
പ്രതികരിക്കാൻ ഇവിടെ എഴുതുക: