തിരുവനന്തപുരം: മുന്‍ മിസ് കേരള അന്‍സി കബീറിന്റെ വാഹനാപകടമരണം സംബന്ധിച്ച ദുരൂഹത നീക്കണമെന്ന് ആവശ്യപ്പെട്ട് അന്‍സി കബീറിന്റെ പിതാവ് മുഖ്യമന്ത്രി പിണറായി വിജയന് ചൊവ്വാഴ്ച പരാതി നല്‍കി. അന്‍സി സന്ദര്‍ശിച്ച നിശാപാര്‍ട്ടി നടന്ന ഹോട്ടലുമായി ബന്ധപ്പെട്ട് നിലനില്‍ക്കുന്ന ദുരൂഹതകള്‍ നീക്കണമെന്നും പരാതിയില്‍ അന്‍സിയുടെ പിതാവ് ആവശ്യപ്പെട്ടിട്ടുണ്ട്.
അന്‍സി കബീര്‍ ലഹരി വസ്തുക്കളോ മദ്യമോ ഉപയോഗിച്ചിരുന്നില്ലെന്നാണ് പോസ്റ്റ് മോര്‍ട്ടം റിപ്പോര്‍ട്ടില്‍ പറയുന്നത്. ഹോട്ടലില്‍ നിന്നും പുറത്തിറങ്ങിയ അന്‍സി കബീറിനെയും കൂട്ടരെയും പിന്തുടര്‍ന്ന കാര്‍ സംബന്ധിച്ച ദുരൂഹത നീക്കണമെന്ന് ആവശ്യപ്പെട്ടിട്ടുണ്ട്. ഈ കാര്‍ മോഡലുകളെ പിന്തുടരാനുണ്ടായ കാരണമെന്തെന്ന് കണ്ടെത്തണമെന്നും പരാതിയില്‍ ആവശ്യപ്പെട്ടിട്ടുണ്ട്.
കേസിലെ നിര്‍ണ്ണായക തെളിവായ ഹാര്‍ഡ് ഡിസ്‌ക് സംബന്ധിച്ചും ദുരൂഹതയുണ്ടെന്ന് പരാതിയില്‍ പറയുന്നു. ഹോട്ടലുടമ ഹാര്‍ഡ് ഡിസ്‌ക് കായലില്‍ എറിഞ്ഞെന്നാണ് പരാതി. ഈ ഹാര്‍ഡ് ഡിസ്‌കിന് വേണ്ടി കഴിഞ്ഞ ദിവസം കായലില്‍ തിരച്ചില്‍ നടത്തിയിട്ടും കണ്ടെത്താന്‍ കഴിഞ്ഞിരുന്നില്ല.
എന്തായാലും മോഡലുകളുടെ വാഹനാപകടമരണം പ്രത്യേക കേസായി പരിഗണിച്ച് അന്വേഷണക്കാമെന്ന് മുഖ്യമന്ത്രി കുടുംബത്തിന് ഉറപ്പ് നല്‍കിയതായി പറയുന്നു.
പ്രതികരിക്കാൻ ഇവിടെ എഴുതുക: