അഹമ്മദാബാദ്: അഹമ്മദാബാദ് ആസ്ഥാനമായുള്ള ഫിസിക്കല് റിസര്ച്ച് ലബോറട്ടറിയിലെ (പിആര്എല്) ശാസ്ത്രജ്ഞര് ഭൂമിയില് നിന്ന് 725 പ്രകാശവര്ഷം അകലെയുള്ള ഒരു എക്സോപ്ലാനെറ്റിനെ കണ്ടെത്തിയിരിക്കുന്നു. ഈ ഗ്രഹം നമ്മുടെ സൂര്യനേക്കാള് 1.5 മടങ്ങ് പിണ്ഡമുള്ള ഒരു നക്ഷത്രത്തെ ചുറ്റുന്നുതായും ശാസ്ത്രജ്ഞര് കണ്ടെത്തി. നമ്മുടെ സൗരയൂഥത്തിന് പുറത്ത് ഏതെങ്കിലും ഒരു നക്ഷത്രത്തെ പരിക്രമണം ചെയ്യുന്ന ഗ്രഹങ്ങളെയാണ് എക്സോപ്ലാനെറ്റുകള് എന്നു വിളിക്കുന്നത്.
പുതുതായി കണ്ടെത്തിയ ഈ ഗ്രഹത്തിന് വ്യാഴത്തിന്റെ 1.4 മടങ്ങ് വലിപ്പമുണ്ട്. ഈ ഗ്രഹം അതിന്റെ നക്ഷത്രത്തെ അസാധാരണമാം വിധം വളരെ അടുത്താണ് പരിക്രമണം ചെയ്യുന്നത്. ഗ്രഹവും അതിന്റെ നക്ഷത്രവും തമ്മിലുള്ള ദൂരം സൂര്യനും ബുധനും തമ്മിലുള്ള ദൂരത്തിന്റെ പത്തിലൊന്നു മാത്രമാണ്. അതിനാല് തന്നെ വെറും 3.2 ഭൗമ ദിനങ്ങള്ക്കുള്ളില് ഒരു ഭ്രമണം പൂര്ത്തിയാക്കും. വ്യാഴത്തേക്കാള് വലുതാണെങ്കിലും സൗരയൂഥത്തിലെ ഏറ്റവും വലിയ ഗ്രഹത്തിന്റെ 70 ശതമാനം മാത്രമാണ് ഇതിന്റെ പിണ്ഡം.
നക്ഷത്രത്തിന്റെ വളരെ അടുത്തായതിനാല് ഈ ഗ്രഹത്തിന്റെ ഉപരിതല താപനില 2,000 ഡിഗ്രി കെല്വിന് (1726.85 ഡിഗ്രി സെല്ഷ്യസ്) വരെ ആയിരിക്കാനാണ് സാധ്യത. ഈ സവിശേഷതകളുള്ള ഗ്രഹങ്ങളെ പലപ്പോഴും ചൂടുള്ള വ്യാഴം എന്നാണ് വിളിക്കുന്നത്. ഇത്തരത്തില് എട്ട് എക്സോപ്ലാനെറ്റുകള് ഇതു വരെ കണ്ടെത്തിയിട്ടുണ്ട്.
രാജസ്ഥാന് ഗുരുഷികറിലെ മൗണ്ട് അബു ഒബ്സര്വേറ്ററിയിലെ ലബോറട്ടറിയില് സ്ഥാപിച്ചിട്ടുള്ള 43 സെന്റിമീറ്റര് ടെലിസ്കോപ്പില് പിഐര്എല് അഡ്വാന്സ്ഡ് റേഡിയല് വെലോസിറ്റി അബു സ്കൈ സെര്ച്ച് (പാഴ്സ്) ഒപ്ടിക്കല് ഫൈബര് ഫെഡ് സ്പെക്ടോഗ്രാഫ് ഉപയോഗിച്ചാണ് ഈ എക്സോപ്ലാനറ്റ് കണ്ടെത്തിയത്.
2020 ഡിസംബറിനും 2021 മാര്ച്ചിനും ഇടയിലാണ് ഈ കണ്ടെത്തല് നടത്തിയത്. ഈ വര്ഷം ഏപ്രിലില് ജര്മ്മനിയുടെ ടിസിഇഎസ് സ്പെക്ടോഗ്രാഫില് നിന്നും മൗണ്ട് അബുവിലെ 43 സെന്റിമീറ്റര് ടെലിസ്കോപ്പില് നിന്നുള്ള സ്വതന്ത്ര ഫോട്ടോമെട്രിക് നിരീക്ഷണങ്ങളില് നിന്നും കൂടുതല് അളവുകള് ശേഖരിച്ചാണ് പഠനം നടത്തിയത്.
പുതുതായി കണ്ടെത്തിയ ഈ എകസോപ്ലാനെറ്റിനെ എച്ച്ഡി 82139ബി അല്ലെങ്കില് ടിഒഐ 1789ബി എന്നാണ് വിളിക്കുന്നത്. ഈ ഗ്രഹം പരിക്രമണം ചെയ്യുന്ന നക്ഷത്രത്തെ എച്ച് ഡി 82139 അല്ലെങ്കില് ടിഒഐ 1789 എന്നും വിളിക്കുന്നു.
