ന്യൂയോര്ക്ക്: അമേരിക്കയില് മലയാളി വെടിയേറ്റ് മരിച്ചു. പത്തനംതിട്ട കോഴഞ്ചേരി സ്വദേശി സാജന് മാത്യു (56) ആണ് ഡാളസ് കൗണ്ടി മസ്കിറ്റ് സിറ്റിയില് കൊല്ലപ്പെട്ടത്. മോഷണ ശ്രമത്തിനിടെയാണ് വെടിവയ്പ്പുണ്ടായത്. രക്ഷപ്പെട്ട അക്രമിക്കായുള്ള തിരച്ചില് ശക്തമാക്കിയിട്ടുണ്ട്.
ബുധനാഴ്ച ഉച്ചയ്ക്ക് ഒരു മണിയോടെ കടയിലേക്ക് അതിക്രമിച്ചു കയറിയ അക്രമി മോഷണ ശ്രമത്തിനിടയിലാണ് കൗണ്ടറില് ഉണ്ടായിരുന്ന സാജന് നേരെ നിറയൊഴിക്കുകയായിരുന്നു. . വെടിവെപ്പ് നടന്ന വിവരം അറിഞ്ഞു സ്ഥലത്തെത്തിയ പോലീസ് ഉടനെ സാജനെ അടുത്തുള്ള ആശുപത്രിയില് എത്തിച്ചെങ്കിലും രക്ഷിക്കാനായില്ല.
കോഴഞ്ചേരി ചെരുവില് കുടുംബാംഗമായ സാജന് മാത്യൂസ് 2005ല് കുവൈത്തില് നിന്നാണ് അമേരിക്കയില് എത്തിയത്. ഡാലസ് സെഹിയോന് മാര്ത്തോമാ ചര്ച്ച് അംഗമാണ്. ഡാലസ് പ്രസ്ബിറ്റിരിയന് ഹോസ്പിറ്റലിലെ നഴ്സ് മിനി സജിയാണ് ഭാര്യ. രണ്ടു മക്കളുണ്ട്. മസ്കിറ്റില് ഈയിടെയാണ് മലയാളികള് പാര്ട്ട്ണര്മാരായി സാജന് ബ്യുട്ടി സപ്ലൈ സ്റ്റോര് ആരംഭിച്ചത് . സെഹിയോന് മാര്ത്തോമാ ചര്ച്ചിലെ യുവജന സംഘത്തിന്റെ സജീവ അംഗമായിരുന്നു.
രാത്രി വൈകിട്ടും പ്രതിയെക്കുറിച്ചുള്ള വിവരങ്ങള് പോലീസ് പുറത്തു വിട്ടിട്ടില്ല . സാജന്റെ മരണം ഡാളസ്സിലെ മലയാളി സമൂഹത്തെ ഞെട്ടിച്ചിരിക്കുകയാണ് . സംഭവം അറിഞ്ഞത് മുതല് സാജന്റെ കുടുംബാംഗങ്ങളെ ആശ്വസിപ്പിക്കുന്നതിന് നിരവധി മലയാളികളാണ് എത്തിക്കൊണ്ടിരിക്കുന്നത്.
