പാലക്കാട് : പാര്‍ട്ടി അറിയാതെ ആദിവാസി കോളനിയില്‍ മഴക്കെടുതി കിറ്റ് നല്‍കിയതില്‍ എസ്‌സി പ്രമോട്ടര്‍ക്കെതിരെ ഭീഷണിയുംായി സിപിഎം ലോക്കല്‍ സെക്രട്ടറി. എസ്‌സി പ്രമോട്ടര്‍ മണികണ്ഠനെതിരെ അയിലൂര്‍ ലോക്കല്‍ സെക്രട്ടറി സജിത്താണ് ഭീഷണിയുമായി എത്തിയിരിക്കുന്നത്.
മണികണ്ഠനെ ഫോണ്‍ വിളിച്ചായിരുന്നു ഭീഷണിപ്പെടുത്തല്‍. പാര്‍ട്ടി അറിയാതെ പഞ്ചായത്തില്‍ എന്തെങ്കിലും പരിപാടി നടത്തിയാല്‍ പണി പീസ് പീസാക്കും. എസ്‌സി പ്രമോട്ടര്‍ ആക്കിയത് പാര്‍ട്ടിയല്ലേ. പാര്‍ട്ടിയറിയാതെ അനങ്ങിയാല്‍ വട്ടപ്പൂജ്യമാക്കി തരും ഞാന്‍, നിന്റെ മറ്റേ ടീമൊന്നും കൂടെ കാണില്ലെന്നായിരുന്നു സജിത്തിന്റെ ഭീഷണി. ഇതിന്റെ ഓഡിയോ പുറത്തുവന്നിട്ടുണ്ട്.
അയിലൂര്‍ പഞ്ചായത്തിലെ കോണ്‍ഗ്രസ് അംഗത്തിന്റെ വാര്‍ഡില്‍ മഴക്കിറ്റ് വിതരണം ചെയ്തതിനാണ് എസ്ടി പ്രമോട്ടര്‍ക്ക് നേരെയുണ്ടായ ഈ ഭീഷണി. കിറ്റ് നല്‍കിയത് ഡിപ്പാര്‍ട്‌മെന്റും സര്‍ക്കാരും വാര്‍ഡ് മെമ്പര്‍മാരെ അറിയിച്ച് കോളനികളില്‍ കൊടുക്കുന്നതാണിത്. പഞ്ചായത്ത് പ്രസിഡന്റിന്റെ അനുമതിയോടെയാണ് നല്‍കിയതെന്ന് മണികണ്ഠന്‍ മറുപടി നല്‍കിയെങ്കിലും സജിത്ത് ഇതൊന്നും മുഖവിലയ്‌ക്കെടുത്തില്ല.
പാര്‍ട്ടി സമ്മേളനത്തിന്റെ ഭാഗമായി രണ്ടാഴ്ച മുമ്പാണ് സിപിഎം ലോക്കല്‍ സെക്രട്ടറിയായി സജിത്ത് ചുമതലയേറ്റത്. മണികണ്ഠനും സിപിഎം അനുഭാവിയാണ്. എന്നാല്‍ പാര്‍ട്ടിയിലെ പ്രാദേശിക വിഭാഗീയതയില്‍ ഇരുവരും രണ്ട് ചേരിയിലാണ്.
പ്രതികരിക്കാൻ ഇവിടെ എഴുതുക: