ഷൊര്ണൂര്: ശിശുദിനമായ ഞായറാഴ്ച രണ്ടു കുഞ്ഞുങ്ങള് കൊല്ലപ്പെട്ട വാര്ത്ത കേട്ടാണ് മഞ്ഞക്കാട് ഗ്രാമം ഉണര്ന്നത്. പരിയംകണ്ടത്ത് വീട്ടിലാണ് ഈ ദാരുണമായ സംഭവം നടന്നത്. രണ്ട് പിഞ്ചുകുഞ്ഞുങ്ങളെ കൊലപ്പെടുത്തുകയും അമ്മയും മുത്തശ്ശിയും ആത്മഹത്യക്ക് ശ്രമിക്കുകയും ചെയ്തു. വിനോദ് – ദിവ്യ ദമ്പതികളുടെ നാല് വയസുള്ള അനിരുദ്ധ്, ഒരു വയസുള്ള അഭിനവ് എന്നിവരെയാണ് അമ്മ ദാരുണമായി കൊലപ്പെടുത്തിയത്. തുടര്ന്ന് അമ്മ ദിവ്യ ആത്മഹത്യക്കും ശ്രമിച്ചു.
കൈത്തണ്ട മുറിച്ച ശേഷം ഉറക്കഗുളിക കഴിച്ചായിരുന്നു ജീവനൊടുക്കാന് ശ്രമിച്ചത്. വിനോദ്, ഭാര്യ ദിവ്യ, വിനോദിന്റെ അമ്മയുടെ അമ്മ അമ്മിണിയമ്മ, രണ്ടുകുട്ടികള് എന്നിവരായിരുന്നു വീട്ടില് താമസം. രാവിലെ ദിവ്യയെ കൈത്തണ്ട മുറിച്ച നിലയില് കണ്ടെത്തിയതോടെ ഇവരെ ആശുപത്രിയിലേക്ക് കൊണ്ടുപോയി. ഈ സമയം വീട്ടിലുണ്ടായിരുന്ന കുട്ടികള് ഉറങ്ങുകയാണെന്നാണ് ബന്ധുക്കള് വിചാരിച്ചത്. എഴുനേല്പിക്കാന് ശ്രമിച്ചപ്പോഴാണ് മയങ്ങിക്കിടക്കുന്ന നിലയില് കുട്ടികളെ കണ്ടെത്തിയത്. തുടര്ന്ന് ഇവരെയും ആശുപത്രിയിലേക്ക് കൊണ്ടുപോയി. എന്നാല് അവിടെ എത്തും മുന്പേ കുഞ്ഞുങ്ങള് മരിച്ചിരുന്നു.
അതിനിടെ ദിവ്യയുടെ ഭര്ത്താവ് വിനോദിന്റെ അമ്മയുടെ അമ്മ അമ്മിണിയമ്മയും കൈത്തണ്ട മുറിച്ച് ആത്മഹത്യക്ക് ശ്രമിച്ചത്. കുടുംബപ്രശ്നങ്ങളാണ് കൊലപാതകത്തിലേക്കും ആത്മഹത്യാശ്രമത്തിലേക്കും നയിച്ചതെന്നാണ് സൂചന. ഇന്നലെവരെ കളിച്ചുചിരിച്ചു നടന്ന കുട്ടികളെ സ്വന്തം അമ്മതന്നെ കൊലപ്പെടുത്തിയെന്ന സംഭവത്തിന്റെ ഞെട്ടലിലാണ് മഞ്ഞക്കാട് ഗ്രാമം.
ദിവ്യയും അമ്മിണിയമ്മയും വാണിയംകുളത്തെ സ്വകാര്യ ആശുപത്രിയില് ചികിത്സയിലാണ്. ഉന്നത പോലീസ് ഉദ്യോഗസ്ഥര് സ്ഥലത്തെത്തി അന്വേഷണം നടത്തി വീട് സീല് ചെയ്തു. പോസ്റ്റ് മോര്ട്ടത്തിന് ശേഷം കുട്ടികളുടെ മൃതദേഹം ബന്ധുക്കള്ക്ക് വിട്ട് കൊടുക്കും.
