ബഹിരാകാശത്ത് അലഞ്ഞു തിരിഞ്ഞു നടക്കുന്ന ഒരുപാട് പാറക്കൂട്ടങ്ങളുണ്ട്. ഇവയെ ഛിന്നഗ്രഹങ്ങള്‍ എന്നാണ് വിളിക്കുന്നത്. അവയില്‍ നല്ലൊരു ശതമാനവും ഭൂമിയ്‌ക്ക് യാതൊരു പ്രശ്‌നവും കൂടാതെ കടന്നു പോകും. എന്നാല്‍ ഇവയില്‍ ഭൂമിയ്‌ക്ക് വളരെ അടുത്തുകൂടെയോ ഭൂമിയെ ലക്ഷ്യമാക്കിയോ വരുന്നവയുമുണ്ട്. ഇത്തരത്തിലുള്ള ഛിന്നഗ്രഹങ്ങള്‍ ഭൂമിക്ക് വലിയ ഭീഷണി ഉയര്‍ത്തുന്നവയാണ്. ഭൂമിയെ ലക്ഷ്യമിട്ടു വരുന്ന ഛിന്നഗ്രഹങ്ങളുടെ സഞ്ചാര പാത ബഹിരാകാശ ഗവേഷകര്‍ സസൂക്ഷ്മം നിരീക്ഷിക്കുന്നുണ്ട്.
ഇതു വരെ പലതും ഭൂമിയ്‌ക്കരികിലൂടെ കടന്നു പോയിട്ടുണ്ട്. ചിലതെല്ലാം ഭൂമിയുടെ അന്തരീക്ഷത്തിലേക്ക് പ്രവേശിച്ച് അവിടെ വെച്ചു തന്നെ പൊട്ടിത്തെറിച്ചു പോകാറുമുണ്ട്. എന്നാല്‍ അന്തരീക്ഷത്തില്‍ വെച്ച് കത്തി തീരാതെ ഭൂമിയെ ലക്ഷ്യമാക്കി വരുന്ന ഉല്‍ക്കാശിലകള്‍ക്ക് പതിനായിരക്കണക്കിന് ആറ്റം ബോംബുകളുടെ ശേഷിയുണ്ടാകും. അതായത് ഇത്തരത്തിലുള്ളൊരു ഛിന്നഗ്രഹം ഭൂമിയില്‍ പതിച്ചാല്‍ ലോകാവസാനം വരെ സംഭവിക്കാം.
ഇങ്ങനെ ഭൂമിയെ ലക്ഷ്യമാക്കിവരുന്ന ഛിന്നഗ്രഹങ്ങളെ അതിന്റെ സഞ്ചാര പാത തിരിച്ചു വിടാനുള്ള വഴി തേടുകയാണ് ശാസ്ത്രലോകം. ഇതിന്റെ ഭാഗമായി അമേരിക്കന്‍ ബഹിരാകാശ ഏജന്‍സിയായ നാസ വികസിപ്പിച്ച ഒരു പ്രതിരോധ സംവിധാനത്തിന്റെ ആദ്യ പരീക്ഷണം ഈ മാസമുണ്ടാകും.
ഛിന്നഗ്രഹത്തില്‍ ഒരു പേടകം ഇടിച്ചിറക്കി അതിന്റെ ദിശ മാറ്റി വിടുകയാണ് ഈ പ്രതിരോധ സംവിധാനം ചെയ്യുക. ഈ മാസം 23ന് നടക്കാനിരിക്കുന്ന പരീക്ഷണത്തിന് ഡബിള്‍ ആസ്‌ട്രോയിഡ് റീഡയറക്ടഷന്‍ ടെസ്റ്റ് (ഡാര്‍ട്ട്) എന്നാണ് പേരിട്ടിരിക്കുന്നത്.
ഡിഡിമോസ് എന്ന് വിളിക്കപ്പെടുന്ന വലിയൊരു ഛിന്നഗ്രഹത്തെ വലം വെക്കുന്ന മൂണ്‍ലെറ്റ് ഛിന്നഗ്രഹമായ ഡൈമോര്‍ഫസിലാണ് പേടകം ഇടിച്ചിറക്കി പരീക്ഷണം നടത്തുക. ഈ ഛിന്നഗ്രഹങ്ങള്‍ ഭൂമിയ്‌ക്ക് ഭീഷണി സൃഷ്ടിക്കുന്നവയല്ല. പേടകത്തിന്റെ സഞ്ചാരവും അത് ഛിന്നഗ്രഹത്തില്‍ ഇടിച്ചിറക്കുന്നതുമെല്ലാം നാസ ദൂരദര്‍ശിനി ഉപയോഗിച്ച് നിരീക്ഷിക്കുകയും പരീക്ഷണത്തിന്റെ വിവരങ്ങള്‍ ശേഖരിക്കുകയും ചെയ്യും.
525 അടിയാണ് ഡൈമോര്‍ഫസ് എന്ന ഛിന്നഗ്രഹത്തിന്റെ വ്യാസം. ഇതിനെ തകര്‍ക്കാന്‍ പേടകത്തിന് സാധിക്കില്ലെങ്കിലും ഇതിന്റെ സഞ്ചാര പഥത്തില്‍ മാറ്റം വരുത്താന്‍ സാധിക്കുമെന്നാണ് നാസ കരുതുന്നത്. എന്നാല്‍ പേടകം ഇടിച്ചിറക്കുമ്പോള്‍ സഞ്ചാര പഥത്തിന് എത്രത്തോളം മാറ്റമുണ്ടാവുമെന്ന കാര്യത്തില്‍ വ്യക്തതയില്ല. ഇത് ഛിന്നഗ്രഹത്തിന്റെ സ്വഭാവം പോലെയിരിക്കുമെന്നാണ് ശാസ്ത്രജ്ഞര്‍ പറയുന്നത്. നിരവധി സാങ്കേതിക വിദ്യകള്‍ ഉപയോഗിച്ചാണ് ഡാര്‍ട്ട് നിര്‍മിച്ചിരിക്കുന്നത്. എലോണ്‍ മസ്‌കിന്റെ കീഴിലുള്ള സ്‌പേസ് എക്‌സിന്റെ ഫാല്‍ക്കണ്‍ 9 റോക്കറ്റിലണ് പേടകം വിക്ഷേപിക്കുക.
പ്രതികരിക്കാൻ ഇവിടെ എഴുതുക: