തൃശൂർ: മഹാത്മാഗാന്ധി സ്ഥാപിച്ച സബർമതി ആശ്രമം കാണാൻ വിവിധ നാടുകൾ ചുറ്റി വിവിധ സംസ്കാരങ്ങളെ കണ്ടും കേട്ടും മനസിലാക്കി 2000 കി.മീ സൈക്കിളിൽ സഞ്ചരിച്ച് ലക്ഷ്യത്തിലെത്തിയിരിക്കുകയാണ് ഒരു അച്ചനും മകനും. അരിമ്പൂരിൽ നിന്ന് ഗുജറാത്തിലെ സബർമതി ആശ്രമത്തിലേക്ക് കുന്നത്തങ്ങാടി സ്വദേശി ശശികുമാറും മകൻ ആനന്ദും ചേർന്ന് ഒക്ടോബർ 2 ഗാന്ധി ജയന്തി ദിനത്തിലാണ് സൈക്കിളിൽ യാത്ര തിരിച്ചത്. അരിമ്പൂർ പാഠശാലയുടെ നേതൃത്വത്തിൽ സംഘടിപ്പിച്ചതാണ് ഇവരുടെ യാത്ര. 32 ദിവസം സൈക്കിൾ ചവിട്ടി കൊണ്ട് കോഴിക്കോട്, കാസർഗോഡ്, മംഗലാപുരം, ഹുബ്ലി, മഹരാഷ്ട്രയിലെ നാസിക് വഴി ഗുജറാത്തിലെ അഹമ്മദാബാദ് നഗരത്തിനടുത്തുള്ള സബർമതി ആശ്രമത്തിലെത്തിയത്.
സഞ്ചരിക്കുന്ന വഴിയിലുള്ള ഗ്രാമീണരെയും, സംസ്കാരങ്ങളെയും കണ്ടും പഠിക്കാനും കൂടിയായിരുന്നു ഇവരുടെ യാത്ര. കർഷകർ, വിവിധ കൃഷിരീതികൾ ഇവയെല്ലാം കണ്ടും മനസിലാക്കിയും ഗ്രാമീണ റോഡുകളിലൂടെയായിരുന്നു ഇവർ കൂടുതലും സഞ്ചരിച്ചത്. ഒരു ദിവസം ശരാശരി 60 കി.മീ സൈക്കിൾ ചവിട്ടും. പഞ്ചർ അടക്കാനുള്ള സാമഗ്രികൾ അടക്കമുള്ള ഒരു ടൂൾകിറ്റും ഇവർ കയ്യിൽ കരുതിയിരുന്നു. ഗിയർ ഉള്ള സൈക്കിളിലായിരുന്നു യാത്രയെങ്കിലും മഹാരാഷ്ട്രയിലെ ചെങ്കുത്തായ കയറ്റങ്ങൾ ഇവർക്ക് വെല്ലുവിളികളായിരുന്നു.
രാവിലെ 7 മണിക്ക് സൈക്കിളിൽ കയറിയാൽ ഉച്ചക്ക് 12 വരെ ചവിട്ടും. ഭക്ഷണ ശേഷം 4 മണി വരെ വിശ്രമം. തുടർന്ന് രാത്രി 7 മണി വരെ വീണ്ടും സഞ്ചാരം. കൃഷിക്കാരുടെ വീടുകളിലും ദാബകളിലുമായിരുന്നു മിക്കവാറും അന്തിയുറക്കം. അന്യ ദേശക്കാരായ തങ്ങളോട് ഇവർ കാണിച്ച ആദിഥേയ മര്യാദകൾ മാതൃകാപരമാണെന്ന് ശശികുമാർ പറഞ്ഞു. കരിമ്പ്, ചോളം പാടങ്ങൾ കണ്ട്, വിവിധ ദേശക്കാരെയും, സംസ്കാരങ്ങളെയും കണ്ടുള്ള സൈക്കിൾ സവാരി അച്ചനും മകനും വ്യത്യസ്ത അനുഭൂതിയാണ് സമ്മാനിച്ചത്.
ഇന്ത്യൻ സ്വാതന്ത്ര്യ സമരവുമായി ബന്ധപ്പെട്ട ചർച്ചകൾക്ക് വേദിയായ മഹാത്മാ ഗാന്ധി ഇന്ത്യയിൽ സ്ഥാപിച്ച സബർമതി ആശ്രമത്തിലേക്ക് സൈക്കിൾ ചവിട്ടിയെത്തിയ ശശികുമാറിനെയും മകൻ ആനന്ദിനെയും സബർമതി ആശ്രമം മുഖ്യ രക്ഷാധികാരി അതുൽ പാണ്ഡെ ചർക്ക നൽകി സ്വീകരിച്ചു. ആശ്രമത്തെ പറ്റി കൂടുതൽ മനസിലാക്കാനുള്ള സൗകര്യവും ഇവർക്ക് ചെയ്തു കൊടുത്തു.
കുന്നത്തങ്ങാടി വടമന വീട്ടിൽ ശശികുമാർ ജനറൽ ഇൻഷൂറൻസ് ഏജന്റാണ്. മകൻ ആനന്ദ് ഇരിങ്ങാലക്കുട ക്രൈസ്റ്റ് കോളേജിലെ രണ്ടാം വർഷ ഡിഗ്രി വിദ്യാർത്ഥിയാണ്.
