കോട്ടയം : ജാതീയമായി അധിക്ഷേപിച്ചെന്ന ആരോപണത്തില്‍ നീതി ഉറപ്പാക്കുമെന്ന മന്ത്രിയുടെ വാക്കല്ല നടപടിയാണ് വേണ്ടതെന്ന് ദളിത് ഗവേഷക വിദ്യാര്‍ത്ഥി ദീപ പി. മോഹന്‍. വിഷയത്തില്‍ അധ്യാപകനെതിരെ നടപടി സ്വീകരിക്കുമെന്നും വിദ്യാര്‍ത്ഥിക്ക് നീതി ഉറപ്പാക്കുമെന്നും മന്ത്രി ആര്‍. ബിന്ദു തന്റെ ഫേസ്ബുക്ക് പോസ്റ്റിലൂടെ അറിയിച്ചിരുന്നു. ഇതിനോട് പ്രതികരിക്കുകയായിരുന്നു ദീപ.
വിഷയത്തില്‍ വിദ്യാര്‍ത്ഥിനിയുടെ പക്ഷത്തുനിന്ന് കാര്യങ്ങള്‍ കണ്ട് പ്രശ്‌നം പരിഹരിക്കാന്‍ സര്‍വ്വകലാശാല അധികൃതര്‍ ശ്രമിച്ചിരുന്നു. ഒരു വിധ മാനസികപ്രയാസത്തിനോ സാങ്കേതികതടസ്സങ്ങള്‍ക്കോ ഇടവരുത്താതെ ദീപയ്‌ക്ക് ഗവേഷണം പൂര്‍ത്തിയാക്കാന്‍ അവസരമൊരുക്കാമെന്നും അതിനുവേണ്ട ലൈബ്രറി- ലാബ്- ഹോസ്റ്റല്‍ സംവിധാനങ്ങളുള്‍പ്പെടെ എല്ലാ പശ്ചാത്തല സൗകര്യങ്ങളും നല്‍കാമെന്നും താന്‍തന്നെ ഗൈഡായി പ്രവര്‍ത്തിക്കാമെന്നും വൈസ് ചാന്‍സലര്‍ ഉറപ്പുകൊടുക്കുകയും ചെയ്തിട്ടുണ്ട്.
ആരോപണവിധേയനായ അധ്യാപകന് ഡോ. നന്ദകുമാറിന്റെ കാര്യത്തില്‍ ദീപ ആവശ്യപ്പെട്ട നടപടിയെടുക്കാന്‍ സര്‍വ്വകലാശാല തടസ്സമുന്നയിച്ച സാഹചര്യത്തിലാണ് സമരം നീണ്ടുപോകുന്നത്. വിഷയത്തില്‍ ഹൈക്കോടതിയും പട്ടികവര്‍ഗ്ഗ കമ്മിഷനും ഇടപെട്ടിട്ടുള്ളതാണ്. ഇവകൂടി പരിഗണിച്ച് വിദ്യാര്‍ത്ഥിനിയുടെ പരാതി സര്‍വ്വകലാശാല എത്രയും പെട്ടെന്ന് തീര്‍പ്പാക്കണമെന്നാണ് സര്‍ക്കാരിന്റെ നിലപാട്.
ആരോപണവിധേയനായ അധ്യാപകനെ പദവിയില്‍നിന്ന് മാറ്റിനിര്‍ത്തി പരാതി അന്വേഷിക്കാന്‍ എന്താണ് സര്‍വ്വകലാശാലയ്‌ക്ക് തടസ്സമെന്ന് ആരാഞ്ഞിട്ടുണ്ട്. സാങ്കേതിക തടസമുണ്ടെങ്കില്‍ അതിനാധാരമായ രേഖകള്‍ എന്തെല്ലാമാണെന്ന് അറിയിക്കാനും സര്‍വകലാശാലയോട് ആവശ്യപ്പെട്ടിട്ടുണ്ട്. വിദ്യാര്‍ത്ഥിനിയുടെ ആരോഗ്യനിലയില്‍ സര്‍ക്കാരിന് ഉത്ക്കണ്ഠയുണ്ട്. വ്യക്തിപരമായും ആകുലതയുണ്ട്. വിദ്യാര്‍ത്ഥിനിക്ക് നീതി ഉറപ്പാക്കാന്‍ വേണ്ടത് സര്‍വ്വകലാശാലയുടെ വിശദീകരണം കിട്ടിയയുടനെ ചെയ്യുമെന്നായിരുന്നു മന്ത്രിയുടെ പ്രതികരണം.
എന്നാല്‍ അധ്യാപകന് എതിരെ നടപടി എടുക്കാതെ സമരത്തില്‍ നിന്ന് പിന്മാറില്ലെന്നും ദീപ പ്രതികരിച്ചു. സ്റ്റാറ്റിയൂട്ടിന് വിരുദ്ധമായി നന്ദകുമാറും വി.സി. സാബു തോമസും പലതും ചെയ്തിട്ടുണ്ട്. ഇത് പുറത്ത് വരുമെന്ന് ഭയന്നാണ് നന്ദകുമാറിനെ മാറ്റാന്‍ സാബു തോമസ് തയ്യാറാകാത്തത്. ഇതിന്റെ തെളിവുകള്‍ തന്റെ പക്കലുണ്ടെന്നും മന്ത്രിക്ക് കൈമാറാന്‍ തയ്യാറാണ്. നടപടി സ്വീകരിക്കാതെ സമരത്തില്‍ നിന്നും പിന്മാറില്ലെന്നും ദീപ അറിയിച്ചു.
പ്രതികരിക്കാൻ ഇവിടെ എഴുതുക: