ഫേസ്ബുക്ക് 2010ല്‍ അവതരിപ്പിച്ച ഫെയ്‌സ് റെക്കഗ്നിഷന് സംവിധാനം ഉപേക്ഷിക്കുകയാണെന്ന് മെറ്റ അറിയിച്ചു. ഒരു ബില്യണ്‍ ഉപയോക്താക്കളുടെ ഫെയ്‌സ് റെക്കഗ്നിഷന് ഡേറ്റകള്‍ ഡിലീറ്റ് ചെയ്യുമെന്നാണ് ഫേസ്ബുക്കിന്റെ പ്രഖ്യാപനം. ഇതോടൊപ്പം കമ്പനിയുടെ തന്നെ ഫേഷ്യല്‍ റെക്കഗ്നിഷന് സംവിധാനവും ഉപേക്ഷിക്കുന്നതായി മെറ്റയുടെ ആര്‍ട്ടിഫിഷ്യല്‍ ഇന്റലിജന്‍സ് വിഭാഗം വൈസ് പ്രസിഡന്റ് ജെറോം പെസെന്റി അറിയിച്ചു.
ഫെയ്‌സ്ബുക്കിന്റെ പ്രതിദിന സജീവ ഉപയോക്താക്കളില്‍ മൂന്നിലൊന്ന് പേരും ഫെയ്‌സ് റെക്കഗ്നിഷന് ക്രമീകരണം തിരഞ്ഞെടുത്തിട്ടുണ്ട്. അത് തിരിച്ചറിയാന്‍ കഴിയുന്നുണ്ടെന്നും ഇത് നീക്കംചെയ്യുന്നത് ഒരു ബില്യണിലധികം ആളുകളുടെ വ്യക്തിഗത ഫേസ് റെക്കഗ്നിഷന് ടെംപ്ലേറ്റുകള്‍ ഇല്ലാതാക്കുന്നതിന് കാരണമാകുമെന്നും പെസെന്റി കൂട്ടിച്ചേര്‍ത്തു. കൂടാതെ, ഫേസ് റെക്കഗ്നിഷന് ക്രമീകരണം തിരഞ്ഞെടുത്ത ആളുകളെ ഇനി ഫോട്ടോകളിലും വീഡിയോകളിലും സ്വയമേവ തിരിച്ചറിയില്ല, അവരെ തിരിച്ചറിയാന്‍ ഉപയോഗിക്കുന്ന ഫേസ് റെക്കഗ്നിഷന് ടെംപ്ലേറ്റും ഫേസ്ബുക്ക് ഇല്ലാതാക്കും.
ഉപയോക്താക്കളുടെ ആശങ്ക കണക്കിലെടുത്താണ് തീരുമാനമെന്നും അദേഹം വ്യക്തമാക്കി. ഫേസ്ബുക്കിന്റെ ചരിത്രത്തിലെ തന്നെ നിര്‍ണായ നീക്കങ്ങളിലൊന്നാണിത്. ഫേസ്ബുക്ക് മാതൃകമ്പനിയുടെ പേര് മെറ്റ എന്നാക്കി മാറ്റിയതിനുപിന്നാലെയാണ് ഫേസ്ബുക്കിന്റെ ഈ പുതിയ തീരുമാനം. ഫേഷ്യല്‍ റെക്കഗ്നിഷന് അനുമതി നല്‍കിയിട്ടുള്ള ഉപയോക്താക്കളെ ചിത്രങ്ങളില്‍ നിന്ന് തിരിച്ചറിഞ്ഞ് ടാഗ് ചെയ്യുന്നത് ഇതോടെ നിര്‍ത്തലാകും. ഈ വര്‍ഷം ഡിസംബറോടെ ഫേസ് റെക്കഗ്നിഷന് ടെംപ്ലേറ്റുകള്‍ ഇല്ലാതാക്കാന്‍ ഫേസ്ബുക്ക് പദ്ധതിയിടുന്നുണ്ടെങ്കിലും, സിസ്റ്റത്തെ ശക്തിപ്പെടുത്തുന്ന വിപുലമായ അല്‍ഗോരിതമായ ഡീപ്പ് ഫേസിനെ അത് ഇല്ലാതാക്കുന്നില്ലെന്നാണ് റിപ്പോര്‍ട്ടുകള്‍ പറയുന്നു.
ഫേസ്ബുക്കിന്റെ ഫേഷ്യല്‍ റെക്കഗ്നിഷന് സംവിധാനത്തില്‍ വിഡീയോകളില്‍ നിന്നും ചിത്രങ്ങളില്‍ നിന്നും ഉപയോക്താവിന്റെ മുഖം തിരിച്ചറിയാന്‍ കഴിയുമായിരുന്നു. എന്നാല്‍ സ്വകാര്യതയെ ബാധിക്കുന്നുവെന്ന് ചൂണ്ടിക്കാട്ടി ഈ സംവിധാനം നിയമവിരുദ്ധമായി ചില രാജ്യങ്ങള്‍ പ്രഖ്യാപിച്ചിരുന്നു. ഉപയോക്താവിന്റെ സുഹൃത്തിന്റെ മുഖം പോലും തിരിച്ചറിയാന്‍ സാധിക്കുന്നു എന്ന കണ്ടെത്തലിന്റെ അടിസ്ഥാനത്തിലായിരുന്നു ഇത്.
പ്രതികരിക്കാൻ ഇവിടെ എഴുതുക: