മുംബൈ: മഹാരാഷ്‌ട്രയിലെ തീയറ്ററുകള്‍ക്ക് പുതുജീവനേകാന്‍ സിനിമാ പ്രേമികള്‍ ഏറെ പ്രതീക്ഷയോടെ കാത്തിരുന്ന രോഹിത് ഷെട്ടിയുടെ പോലീസ് ചിത്രം ‘സൂര്യവംശി’ പ്രദര്‍ശനത്തിനെത്തുന്നു. വരുന്ന ഒക്ടോബര്‍ 22 ന് 50 ശതമാനം സീറ്റിങ് കപ്പാസിറ്റിയോടെ തീയറ്ററുകള്‍ വീണ്ടും തുറക്കാന്‍ മഹാരാഷ്‌ട്ര സര്‍ക്കാര്‍ അനുമതി നല്‍കിയ ശേഷം പ്രദര്‍ശനത്തിനെത്തുന്ന ആദ്യം ചിത്രമാണ് അക്ഷയ് കുമാര്‍ – കത്രീന കൈഫ് താരജോഡികളൊന്നിക്കുന്ന സൂര്യവംശി.
ദീപാവലി റിലീസിന്റെ ഭാഗമായി നവംബര്‍ അഞ്ചിനാണ് ചിത്രം തീയറ്ററുകളിലെത്തുന്നത്. ദേശീയ ഫിലിം സര്‍ട്ടിഫിക്കേഷന്‍ ബോഡിന്റെ u/a സര്‍ട്ടിഫിക്കറ്റ് നേടിയാണ് ചിത്രം പ്രദര്‍ശനത്തിനെത്തുന്നത്. 145 മിനിറ്റാണ് ചിത്രത്തിന്റെ ദൈർഘ്യം. ബോക്‌സോഫീസില്‍ മാര്‍വെലിന്റെ ‘എറ്റേണല്‍സു’മായിട്ടായിരിക്കും ചിത്രം കൊമ്പുകോര്‍ക്കേണ്ടി വരിക.
മുംബൈ നഗരത്തില്‍ ഭീകരാക്രമണം ആസൂത്രണം ചെയ്യുന്ന തീവ്രവാദികളെ വേട്ടയാടുന്ന സൂര്യവംശിയെന്ന പോലീസുകാരനെ പറ്റിയാണ് ചിത്രം. ബോളിവുഡ് താരമായ അക്ഷയ് കുമാറാണ് എസി.പി സൂര്യവംശിയുടെ വേഷത്തിലെത്തുക. കൂടാതെ ചിത്രത്തില്‍ അജയ് ദേവ്ഗണ്‍ ബാജിറാവു സിങ്കമായും, രണ്‍വീര്‍ സിങ് സിംബയായും അഥിതി വേഷങ്ങളിലെത്തുന്നുണ്ട്.
പ്രതികരിക്കാൻ ഇവിടെ എഴുതുക: