അമ്പലപ്പുഴ: സിപിഎം പ്രവര്ത്തകനായ മത്സ്യതൊഴിലാളിയെ കാണാതായ സംഭവത്തില് അന്വേഷണച്ചുമതല ക്രൈംബ്രാഞ്ചിന് കൈമാറാന് സാദ്ധ്യത. ഒരാഴ്ച പിന്നിട്ടിട്ടും അമ്പലപ്പുഴ പോലീസിന് ഇദ്ദേഹത്തെക്കുറിച്ച് ഒരു വിവരവും ലഭിക്കാതെ വന്നതോടെയാണ് കേസന്വേഷണം പ്രത്യേക സംഘത്തിന് കൈമാറാന് ആലോചിക്കുന്നത്. കഴിഞ്ഞ ബുധനാഴ്ചയാണ് സിപിഎം പൂത്തോപ്പ് ബ്രാഞ്ച് കമ്മിറ്റിയംഗം കൂടിയായ പൊരിയന്റെപറമ്പില് സജീവിനെ കാണാതായത്.
വ്യാഴാഴ്ച ബ്രാഞ്ച് സമ്മേളനം നടക്കാനിരിക്കെ സജീവിനെ കാണാതായത് രാഷ്ട്രീയ വിവാദത്തിനും വഴിവച്ചിരുന്നു. സജീവിനെ കാണാതായതോടെ ബ്രാഞ്ച് സമ്മേളനവും മാറ്റിവച്ചിരുന്നു. ജോലിക്ക് പോയ സജീവിനെ പിന്നീട് കാണാതാകുകയായിരുന്നു. പുത്തന് നടയില് നിന്നും ഇദ്ദേഹം തോട്ടപ്പള്ളിയില് ഓട്ടോറിക്ഷയില് വന്നിറങ്ങുന്നത് കണ്ടവരുണ്ട്. ഇദ്ദേഹത്തെ കാണാതായ ശേഷം സൈബര് സെല്, ഡോഗ് സ്ക്വാഡ് എന്നിവയുടെ സഹായത്തോടെ അന്വേഷണം ശക്തമാക്കിയെങ്കിലും ഒരാഴ്ച പിന്നിട്ടിട്ടും കേസില് ഒരു തുമ്പും കണ്ടെത്താന് പോലീസിന് കഴിഞ്ഞിട്ടില്ല. ഈ സാഹചര്യത്തിലാണ് അന്വേഷണം ക്രൈം ബ്രാഞ്ചിന് വിടാന് ആലോചിക്കുന്നത്. സജീവിനെ കാണാതായ ശേഷം ബന്ധുക്കള് മുഖ്യമന്ത്രിക്ക് ഉള്പ്പെടെ പരാതിയും നല്കിയിരുന്നു.
