തിരുവനന്തപുരം: ആധാര് കേന്ദ്രങ്ങളില് പോകാതെ തന്നെ ആധാര് കാര്ഡിലെ നിങ്ങളുടെ വ്യക്തിഗത വിവരങ്ങളായ പേര്, ജനന തീയതി, മേല്വിലാസം, ഭാഷ തുടങ്ങിയവ വീട്ടിലിരുന്ന സ്വന്തമായി മാറ്റാം. സര്ക്കാരിന്റെ തന്നെ, എസ് എസ് യു പി അഥവാ സെല്ഫ് സര്വ്വീസ് അപ്ഡേറ്റ് പോര്ട്ടലിലൂടെ നിങ്ങള്ക്ക് വിവരങ്ങള് സ്വന്തമായി അപ്ഡേറ്റ് ചെയ്യാവുന്നതാണ്. യു ഐ ഡി എ ഐ നല്കുന്ന വിവരം അനുസരിച്ച്, ആധാര് കാര്ഡ് ഉടമകള്ക്ക് എസ് എസ് യു പിയുടെ പോര്ട്ടല് മുഖാന്തിരം ഒരേ സമയം ഒന്നിലധികം വിവരങ്ങള് മാറ്റാന് സാധിക്കും. സ്വന്തം ഇഷ്ടപ്രകാരം എപ്പോള് വേണമെങ്കിലും വിവരങ്ങളില് മാറ്റം വരുത്താമെന്ന് പക്ഷേ കരുതരുത് ഒരു ആധാര് കാര്ഡ് ഉടമയ്ക്ക് ജീവിതത്തില് ഒരു തവണ മാത്രമേ ജനന തീയ്യതിയില് മാറ്റം വരുത്താന് സാധിക്കുകയുള്ളൂ. ലിംഗ സംബന്ധമായ വിവരങ്ങളിലും ജീവിത കാലത്തില് ഒരു തവണ മാത്രമേ മാറ്റം വരുത്താന് സാധിക്കുകയുള്ളൂ. അതുപോലെ പേരിന്റെ കാര്യത്തില് ജീവിതത്തില് രണ്ടു തവണ മാത്രമേ മാറ്റം വരുത്താന് അനുവാദമുള്ളൂ.
യു ഐ ഡി എ ഐയുടെ ഔദ്യോഗിക ട്വിറ്റര് അക്കൗണ്ടില് ‘എസ് എസ് യു പി ഉപയോഗിച്ച് നിങ്ങളുടെ ജനംഖ്യാപരമായ വിവരങ്ങള് നവീകരിക്കുക’ എന്നാണ് അധികൃതര് കുറിച്ചിരിക്കുന്നത്. കുറിപ്പിനൊപ്പം പോര്ട്ടലിന്റെ ഔദ്യോഗിക ലിങ്കും പങ്കു വെച്ചിട്ടുണ്ട്. ശ്രദ്ധിക്കേണ്ട മറ്റൊരു കാര്യം , ഒരേ സമയം ഒന്നിലധികം വിവരങ്ങളില് മാറ്റം വരുത്തുമ്പോള് ഓരോ തവണയും അപേക്ഷ സമര്പ്പിക്കുമ്പോള് 50 രൂപ ഫീസ് ഇനത്തില് അടക്കേണ്ടതുണ്ട് എന്നതാണ്.
ഓണ്ലൈന് അപ്ഡേഷന് ആവശ്യമായ രേഖകള് ഇവയാണ്.
പേര്: തിരിച്ചറിയല് രേഖയുടെ സ്കാന് ചെയ്ത കോപ്പി
ജനന തീയതി: ജനന തീയതിയുടെ സ്കാന് ചെയ്ത കോപ്പി
ലിംഗ വിവരങ്ങള്: മൊബൈല് വഴി ലഭിക്കുന്ന ഒറ്റിപി സ്ഥിരീകരണം
മേല്വിലാസം: മേല്വിലാസം സ്ഥിരീകരിക്കുന്ന രേഖയുടെ സ്കാന് ചെയ്ത കോപ്പി
ഭാഷ: സ്ഥിരീകരണത്തിനായി രേഖകള് ആവശ്യമില്ല.
ഓണ്ലൈനായി ആധാര് അപ്ഡേറ്റ് ചെയ്യാന് മുകളില് പറഞ്ഞിരിക്കുന്ന രേഖകള് കൂടാതെ ആധാര് കാര്ഡ് രജിസ്റ്റര് ചെയ്തിരിക്കുന്ന മൊബൈല് നമ്പറും ആവശ്യമാണ്. നിങ്ങളുടെ രജിസ്റ്റര് ചെയ്ത നമ്പറില് ലഭിക്കുന്ന ഒറ്റിപി നല്കിയാല് മാത്രമേ അപ്ഡേഷന് പൂര്ത്തിയാവുകയുള്ളു.
ഓണ്ലൈനായി ആധാര് വിവരങ്ങള് അപ്ഡേറ്റ് ചെയ്യേണ്ടത് ഇത്തരത്തിലാണ്-
1: https://ssup.uidai.gov.in/ssup/ എന്ന, യു ഐ ഡി എ ഐയുടെ ഔദ്യോഗിക വെബ്സൈറ്റ് തുറക്കുക.
2: ‘ആധാര് വിവരങ്ങള്അപ്ഡേറ്റ് ചെയ്യാന് തുടരുക’ എന്ന ബട്ടണില് ക്ലിക്ക് ചെയ്യുക.
3: നിങ്ങളുടെ ആധാര് നമ്പറും ക്യാപ്ച്ചാ കോഡും ഉള്പ്പെടെയുള്ള വിവരങ്ങള് ഓണ്ലൈനായി സമര്പ്പിക്കുക.
4: ‘സെന്ഡ് ഒറ്റിപി’ എന്ന ഓപ്ഷന് അമര്ത്തുക.
5: ‘സെന്ഡ് ഒടിപി’ എന്ന ഓപ്ഷന് തിരഞ്ഞെടുത്തു കഴിയുമ്പോള്, നിങ്ങള് രജിസ്റ്റര് ചെയ്തിരിക്കുന്ന മൊബൈല് നമ്പറിലേക്ക് നിങ്ങള്ക്ക് ഒരു ആറക്ക ഒറ്റിപി നമ്പര് ലഭിക്കും
6: ഒറ്റിപി നല്കുന്നതിലൂടെ നിങ്ങളുടെ ജനസംഖ്യാപരമായ വിവരങ്ങള് അപ്ഡേറ്റ് ചെയ്യാന് നിങ്ങള്ക്ക് കഴിയും.
7: ആവശ്യമായ മാറ്റങ്ങള് വരുത്തിയതിന് ശേഷം, ‘പ്രൊസീഡ്’ എന്ന ബട്ടണ് അമര്ത്തുക.
8: നിങ്ങള് അപേക്ഷിച്ച മാറ്റങ്ങളെ സാധൂകരിക്കുന്ന ഔദ്യോഗിക രേഖകള് അപ്ലോഡ് ചെയ്യുക.
9: വിവരങ്ങള് സമര്പ്പിച്ച ശേഷം, നല്കിയ വിവരങ്ങള് പുനഃപരിശോധിക്കുക.
10: ഒടുവില് അപ്ഡേറ്റ് റിക്വസ്റ്റ് നമ്പര് (യു ആര് എന്) ലഭിക്കും. ആധാര് കാര്ഡ് അപ്ഡേഷന് പ്രക്രിയയുടെ നില പരിശോധിക്കാനായി അത് ഉപയോഗിക്കാവുന്നതാണ്.
