കൊച്ചി : എറണാകുളം കളമശ്ശേരിയില് ശുചിമുറിയില് മൃതദേഹം കത്തിക്കരിഞ്ഞ നിലയില് കണ്ടെത്തി. പത്തടിപ്പാലം പതിച്ചേരി കെട്ടിടത്തിന്റെ മൂന്നാമത്തെ നിലയിലെ ശുചിമുറിയിലാണ് പുരുഷന്റെ മൃതദേഹം കണ്ടെത്തിയത്.
ബുധനാഴ്ച രാവിലെ 10.30ഓടെയാണ് സംഭവം. കെട്ടിടത്തിന്റെ മുകളിലെ ശുചിമുറിയില് നിന്നും പുക ഉയരുന്നത് കണ്ട സമീപവാസികള് തീ പിടിത്തമാണെന്ന് കരുതി പോലീസിനേയും ഫയര്ഫോഴ്സിനേയും വിവരം അറിയിക്കുകയായിരുന്നു.
തുടര്ന്ന് പോലീസെത്തി നടത്തിയ പരിശോധനയില് കത്തിക്കരിഞ്ഞ മൃതദേഹം കണ്ടെത്തുകയായിരുന്നു. അതേസമയം മൃതദേഹം ഇതുവരെ തിരിച്ചറിഞ്ഞിട്ടില്ല. കളമശ്ശേരി മെഡിക്കല് കോളേജിലേക്ക് മൃതദേഹം മാറ്റി. സംഭവത്തില് കളമശ്ശേരി പോലീസ് അന്വേഷണം തുടങ്ങി.
