മുംബൈ: ലഹരിപാര്ട്ടിയുമായി ബന്ധപ്പെട്ട് 23-കാരനായ മകന്റെ അറസ്റ്റ് വാര്ത്ത കേട്ട് ഞെട്ടി ഖാന് കുടുംബം. മകന്റെ അറസ്റ്റ് സ്ഥിരീകരിച്ചതിന് പിന്നാലെ ഷാരൂഖ് ഖാനും ഗൗരി ഖാനും അഭിഭാഷകനുമായി ചര്ച്ച നടത്തി. ആര്യന് അറസ്റ്റിലായെന്ന വിവരം സ്ഥിരീകരിച്ചതോടെ ഗൗരി ഖാന് സ്വവസതിയില്നിന്ന് കോടതിയിലേക്ക് പോകുന്ന ദൃശ്യങ്ങളും ദേശീയമാധ്യമങ്ങള് പുറത്തുവിട്ടിട്ടുണ്ട്. ആര്യന് ഖാന്റെ അറസ്റ്റിന് പിന്നാലെ ഷാരൂഖ് ഖാന്റെ ഭാര്യയെ ഗൗരിയെ എന്.സി.ബി. സംഘം ചോദ്യംചെയ്യാന് വിളിപ്പിച്ചെന്ന് ദേശീയ മാധ്യമങ്ങള് റിപ്പോര്ട്ട് ചെയ്യുന്നുണ്ട്.
ഇതോടെ സിനിമ ചിത്രീകരണത്തിനായി സ്പെയിനിലേക്ക് പോകുന്നത് മാറ്റിവെച്ച് ഷാരൂഖ് ഖാന് മുംബൈയില് തുടരാന് തീരുമാനിച്ചു. പത്താന് സിനിമയുടെ ഷൂട്ടിംഗ് ആണ് താരം നിര്ത്തിവച്ചിരിക്കുന്നത്. ദീപിക പദുക്കോണിനൊപ്പമുള്ള ഗാനരംഗത്തിന്റെ ചിത്രീകരണത്തിനായി അടുത്ത ദിവസം സ്പെയിനിലേക്ക് പോകാനിരിക്കുകയായിരുന്നു ഷാരൂഖ്.
ഇന്നലെ രാത്രി മുംബൈ തീരത്ത് ഒരു ക്രൂയിസ് കപ്പലില് നടത്തിയ പാര്ട്ടിയില് നടത്തിയ റെയ്ഡിനെ തുടര്ന്നാണ് താരപുത്രനെ അറസ്റ്റ് ചെയ്തത്. ആര്യന്റെ അമ്മ ഗൗരി ഖാനും മകന്റെ അറസ്റ്റിനെ തുടര്ന്ന് വിദേശ യാത്ര മാറ്റിവെച്ചു. ഇന്റീരിയര് പ്രൊജക്ടുമായി ബന്ധപ്പെട്ട് വിദേശത്തേക്ക് പോകാനിരിക്കുകയായിരുന്ന ഗൗരി ഖാന്.
ലഹരിമാഫിയകളുമായുള്ള ബന്ധത്തിന് ഡിജിറ്റല് തെളിവുകള് ലഭിച്ചതോടെയാണ് ഖാന്റെ 23-കാരനായ മകന് ആര്യന് ഖാനെ നാര്ക്കോട്ടിക് കണ്ട്രോള് ബ്യൂറോ (എന്സിബി) അറസ്റ്റ് ചെയ്തത്. റെയ്ഡിന് ശേഷം ചോദ്യം ചെയ്യപ്പെട്ട എട്ട് പേരില് ഒരാളായിരുന്നു ആര്യന് ഖാന്.
ആര്യന് ഖാന്റെ അടുത്ത സുഹൃത്തായ അര്ബാസ് മര്ച്ചന്റ്, നടിയും മോഡലുമായ മുന്മുന് ധമേച്ച എന്നിവരെയും എന്സിബി അറസ്റ്റ് ചെയ്തിട്ടുണ്ട്. ശനിയാഴ്ച രാത്രിയാണ് കോര്ഡേലിയ ക്രൂയിസ് എന്ന ആഡംബര കപ്പലില് റെയ്ഡ് നടത്തി ആര്യന് ഖാന് ഉള്പ്പെടെയുള്ളവരെ എന്.സി.ബി. സംഘം കസ്റ്റഡിയിലെടുത്തത്. കപ്പലില് ലഹരി പാര്ട്ടി നടക്കുന്നതിനിടെ യാത്രക്കാരെന്ന വ്യാജേന കപ്പലില് കയറിയ എന്.സി.ബി. ഉദ്യോഗസ്ഥര് പ്രതികളെ കൈയോടെ പിടികൂടുകയായിരുന്നു.
ഇവരില്നിന്ന് എം.ഡി.എം.എ, കൊക്കെയ്ന്, ഹാഷിഷ് ഉള്പ്പെടെയുള്ള ലഹരിമരുന്നുകളും പിടിച്ചെടുത്തിട്ടുണ്ട്. തുടര്ന്ന് ഇവരെ മുംബൈയിലെ എന്.സി.ബി. ഓഫീസിലെത്തിച്ച് ചോദ്യംചെയ്യുകയായിരുന്നു. ഏകദേശം 17 മണിക്കൂറോളമാണ് ചോദ്യംചെയ്യല് തുടര്ന്നത്. ആര്യന് ഖാനെ അറസ്റ്റ് ചെയ്തതിന് പിന്നാലെ മുംബൈയിലെ പയ കേന്ദ്രങ്ങളിലും എന്.സി.ബി. സംഘം റെയ്ഡ് നടത്തുകയാണ്. എക്സ്റ്റസി, കൊക്കെയ്ന്, എംഡി (മെഫെഡ്രോണ്), ചരസ് തുടങ്ങിയ മരുന്നുകള് കപ്പലില് ഉണ്ടായിരുന്ന പാര്ട്ടിയില് നിന്ന് കണ്ടെടുത്തതായി അന്വേഷണ സംഘം വ്യക്തമാക്കി.
