പാലക്കാട്: പുരാവസ്തു വില്‍പ്പനയുടെ പേരില്‍ തട്ടിപ്പ് നടത്തിയ കേസിലെ പ്രതി മോന്‍സന്‍ മാവുങ്കലിനെ സര്‍ക്കാരുമായി ബന്ധിപ്പിക്കുന്ന കണ്ണികളെ സംബന്ധിച്ച് അന്വേഷണം നടക്കുന്നില്ലെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. ഇയാളെയും സംസ്ഥാന സര്‍ക്കാരിനെയും തമ്മില്‍ ബന്ധിപ്പിച്ച ഇടനിലക്കാരിയെ പറ്റി അന്വേഷിക്കണമെന്നും സുരേന്ദ്രന്‍ ആവശ്യപ്പെട്ടു. മങ്കരയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ഉന്നത പൊലീസ് ഉദ്യോഗസ്ഥന്‍മാരുമായും ഐഎഎസ്സുകാരുമായും രാഷ്‌ട്രീയ നേതാക്കളുമായുമുള്ള മോന്‍സന്റെ ബന്ധം ക്രൈബ്രാഞ്ച് അന്വേഷിച്ചാല്‍ പുറത്തുകൊണ്ടു വരാനാവില്ല. ഇടനിലക്കാരിക്ക് അഖില കേരള സഭയില്‍ നിര്‍ണായക പങ്കാളിത്തമുണ്ടായെന്നാണ് സംശയിക്കുന്നത്. സംസ്ഥാന സര്‍ക്കാരിന്റെ പല വിദേശയാത്രകളിലും ഇവര്‍ പങ്കെടുത്തിട്ടുണ്ടെന്ന വിവരങ്ങളുണ്ട്. ഇടനിലക്കാരും അധികാരത്തിന്റെ ഇടനാഴിയില്‍ അഴിമതിക്ക് വേണ്ടി സഹായിച്ചവരും കുടുങ്ങണം.
മോന്‍സനുമായി ബന്ധമുള്ള കോണ്‍ഗ്രസ് നേതാക്കളെ കുറിച്ച് അന്വേഷിക്കണ്ടെന്ന സര്‍ക്കാരിന്റെ നിലപാട് ഒത്തുതീര്‍പ്പ് രാഷ്‌ട്രീയമാണ്. മുഖ്യമന്ത്രിയുടെ മൗനം എന്താണെന്ന് മനസിലാവുന്നില്ല. സര്‍ക്കാരിനെ ആദ്യം മുതല്‍ നയിക്കുന്നത് ഇടനിലക്കാരികളാണെന്ന് എല്ലാവര്‍ക്കും അറിയാം. ഇവര്‍ക്കെങ്ങനെ തന്റെ സര്‍ക്കാരില്‍ ഇത്രയും സ്വാധീനമുണ്ടാവുന്നുവെന്ന് മുഖ്യമന്ത്രി വ്യക്തമാക്കണമെന്നും സുരേന്ദ്രന്‍ പറഞ്ഞു.
എഐസിസി അധ്യക്ഷനും സ്വാതന്ത്ര്യസമരനായകനുമായ മങ്കരയില്‍ ചേറ്റൂര്‍ ശങ്കരന്‍ നായരോട് കോണ്‍ഗ്രസ് കാണിക്കുന്നത് ക്രൂരമായ അവഗണനയാണെന്നും കെ.സുരേന്ദ്രന്‍ ആരോപിച്ചു. ബിജെപി സ്വാതന്ത്ര്യസമര നായകരെ ആദരിക്കുന്നതിന്റെ ഭാഗമായാണ് ചേറ്റൂര്‍ സ്മൃതി മണ്ഡപത്തില്‍ പുഷ്പാര്‍ച്ചനയ്‌ക്കെത്തിയത്. എന്നാല്‍ ഏക മലയാളി അദ്ധ്യക്ഷനായിട്ടും കോണ്‍ഗ്രസ് ചേറ്റൂരിനെ തിരിഞ്ഞു നോക്കിയില്ല.
കോണ്‍ഗ്രസ് നേതൃത്വം സ്വാതന്ത്ര്യസമര സേനാനിയെ പൂര്‍ണമായും തിരസ്‌കരിച്ചു. ഇത്രയും മഹാനായ സ്വാതന്ത്ര്യസമരനായകനെ എങ്ങനെയാണ് ഇത്രയും അവഗണിക്കാന്‍ കോണ്‍ഗ്രസിന് സാധിക്കുന്നതെന്ന് മനസിലാവുന്നില്ല. അഴിമതിക്കാരെ വാഴ്‌ത്തി ദേശീയവാദികളെ ഇകഴ്‌ത്തുന്ന കോണ്‍ഗ്രസ് തകര്‍ന്ന് തരിപ്പണമാവും. കോണ്‍ഗ്രസിന്റെ കേഡറിസം കടലാസില്‍ മാത്രമാണ്. ശങ്കരന്‍ നായര്‍ക്ക് സംസ്ഥാന സര്‍ക്കാരും അര്‍ഹമായ പ്രാധാന്യം നല്‍കിയില്ല. അദ്ദേഹത്തിന്റെ ഓര്‍മ്മ എന്നും നിലനിര്‍ത്തുന്ന തരത്തിലുള്ള സ്മാരകം സംരക്ഷിക്കാനും അവിടേക്ക് നല്ല വഴി ഒരുക്കാനും സര്‍ക്കാര്‍ ഇടപെടണമെന്നും സുരേന്ദ്രന്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: