ന്യൂദല്‍ഹി : ബന്ധുനിയമന വിവാദത്തില്‍ ലോകായുക്ത ഉത്തരവ് സ്റ്റേ ചെയ്യണമെന്നാവശ്യപ്പെട്ട് മുന്‍ മന്ത്രി കെ.ടി. ജലീല്‍ സുപ്രീംകോടതിയില്‍ സമര്‍പ്പിച്ച ഹര്‍ജി തള്ളി. നിയമനം നടത്തിയത് ചട്ടങ്ങള്‍ പ്രകാരം അപേക്ഷ ക്ഷണിക്കാതെയാണ്. അതിനാല്‍ സ്റ്റേ ചെയ്തുകൊണ്ടുള്ള ലോകായുക്താ ഉത്തരവ് സ്റ്റേ ചെയ്യാന്‍ സാധിക്കില്ലെന്ന് കോടതി അറിയിക്കുകയായിരുന്നു.
സംസ്ഥാന ന്യൂനപക്ഷ ധനകാര്യ വികസന കോര്‍പറേഷനില്‍ ജനറല്‍ മാനേജരായി ബന്ധു കെ.ടി. അദീബിനെ നിയമിച്ചത് വിവാദമാവുകയും ഇതിനെതിരെ ലോകായുക്ത നടപടി സ്വീകരിക്കുകയുമായിരുന്നു. ഇതിനെതിരെയാണ് ജലീല്‍ കോടതിയെ സമീപിച്ചത്. ലോകായുക്തയുടെ ഉത്തരവില്‍ ഇടപെടാനാവില്ലെന്ന് പറഞ്ഞ കോടതി വിവാദ നിയമനം അപേക്ഷ ക്ഷണിക്കാതെയുള്ളതാണെന്നും ഇത് ഭരണഘടനാ വിരുദ്ധമാണെന്നും നിരീക്ഷിച്ചു.
ലോകായുക്തയുടെ ഉത്തരവില്‍ വീഴ്ചയില്ലെന്ന് വ്യക്തമാക്കിയ കോടതി സ്വാര്‍ത്ഥലാഭത്തിനായി ഒദ്യോഗിക പദവി ദുരുപയോഗിക്കുന്നത് അഴിമതിയാണെന്നും വിമര്‍ശിച്ചു. തുടര്‍ന്ന് കേസ് ഫയലില്‍ സ്വീകരിക്കാതെ തള്ളാന്‍ തീരുമാനിച്ചതോടെ ഹര്‍ജി പിന്‍വലിക്കാന്‍ അനുവദിക്കണമെന്ന് കെ.ടി. ജലീലിന്റെ അഭിഭാഷകന്‍ ആവശ്യപ്പെട്ടു. ഇത് കോടതി അംഗീകരിച്ചു.
സംസ്ഥാന ന്യൂനപക്ഷ ധനകാര്യ വികസന കോര്‍പറേഷനിലെ നിയമനം സത്യപ്രതിജ്ഞാ ലംഘനവും സ്വജനപക്ഷപാതവും നടത്തിയ മന്ത്രിയെ തല്‍സ്ഥാനത്തുനിന്ന് മുഖ്യമന്ത്രി നീക്കണമെന്നുമാണ് ലോകായുക്ത ആവശ്യപ്പെട്ടിരുന്നത്. മന്ത്രിയ ജലീലിനെ മൂന്നുമാസത്തിനുള്ളില്‍ പുറത്താക്കണമെന്നായിരുന്നു ആവശ്യം. തുടര്‍ന്ന് ഒന്നാം പിണറായി സര്‍ക്കാര്‍ കാവല്‍ മന്ത്രിസഭാ കാലയളവില്‍ മന്ത്രിസ്ഥാനത്ത് നിന്ന് ജലീല്‍ രാജിവെക്കുകയായിരുന്നു.
പ്രതികരിക്കാൻ ഇവിടെ എഴുതുക: