ന്യൂദല്ഹി: കോണ്ഗ്രസ് നേതാവ് കപില് സിബലിന്റെ വീടിനു മുന്നില് സോണിയാ ഗാന്ധിയെ അനുകൂലിക്കുന്ന കോണ്ഗ്രസ് പ്രവര്ത്തകരുടെ പ്രതിഷേധം. പ്രതിഷേധക്കാര് വീടിന് മുന്നില് പാര്ക്ക് ചെയ്തിരുന്ന കാറിന്റെ ചില്ലുകള് തകര്ത്തു.
‘കപില് സിബല് വേഗം സുഖം പ്രാപിക്കട്ടെ, വിമതനായ സിബല് പാര്ട്ടി വിടുക’ എന്നെഴുതിയ പ്ലക്കാര്ഡുകളുമായാണ് പ്രതിഷേധക്കാര് ദല്ഹിയിലെ അദേഹത്തിന്റെ വീടിന് മുന്നില് എത്തിയത്. പഞ്ചാബ് കോണ്ഗ്രസിലെ പ്രതിസന്ധിയുമായി ബന്ധപ്പെട്ട് കപില് സിബല് സോണിയഗാന്ധിക്കെതിരെ രൂക്ഷവിമര്ശനം ഉന്നയിച്ചിരുന്നു. ഇതാണ് കോണ്ഗ്രസ് പ്രവര്ത്തകരുടെ പ്രതിഷേധത്തിന് കാരണമായത്.
കോണ്ഗ്രസില് ഇത്തരത്തില് തീരുമാനങ്ങള് എടുക്കുന്നത് ആരാണെന്ന് അറിയില്ലെന്ന് പഞ്ചാബ് വിഷയം ചൂണ്ടിക്കാട്ടി കപില് പരാമര്ശിച്ചിരുന്നു. പാര്ട്ടിയില് പ്രസിഡന്റില്ല. അടിയന്തരമായി കോണ്ഗ്രസ് പ്രവര്ത്തകസമിതി വിളിച്ചുചേര്ക്കണം. അങ്ങനെയെങ്കില് ചുരുങ്ങിയത് ഒരു ചര്ച്ചയെങ്കിലും നടക്കുമെന്നും അദേഹം പരിഹസിച്ചിരുന്നു.
