ന്യൂദല്ഹി : യുവാക്കളെയും യുവതികളെയും ഭയപ്പെടുത്താന് ഹിന്ദു വര്ഗീയവാദികള് കണ്ടെത്തിയ രാക്ഷസനായിരുന്നു ലൗ ജിഹാദ്. നാര്ക്കോട്ടിക് ജിഹാദ് പുതിയ രാക്ഷസനെന്ന് കോണ്ഗ്രസ് നേതാവ് പി. ചിദംബരം. നാര്ക്കോട്ടിക് ജിഹാദ് വിഷയത്തില് മുഖ്യമന്ത്രി പിണറായി വിജയന്റെ സമീപനത്തെ അനുകൂലിച്ച് ഇന്ത്യന് എക്സ്പ്രസില് നല്കിയ ലേഖനത്തിലാണ് ചിദംബരം ഇത്തരത്തില് പ്രതിപാദിച്ചിരിക്കുന്നത്.
ലൗ എന്നതും നാര്കോട്ടിക്സ് എന്നതും യാഥാര്ത്ഥ്യമാണെങ്കിലും ജിഹാദ് എന്ന പദം, ലൗവിനോടും നാര്ക്കോട്ടിക്സിനോടും ചേര്ത്തുവെക്കുമ്പോള് വെളിപ്പെടുന്നത് സങ്കുചിത ചിന്താഗതിയാണ്. നാര്ക്കോട്ടിക് ജിഹാദിന്റെ സൃഷ്ടികര്ത്താവ് ബിഷപ്പ് ജോസഫ് കല്ലറങ്ങാട്ടിനെ പോലെ ഒരു ബിഷപ്പ് ആയതില് എനിക്കും ദശലക്ഷക്കണക്കിന് ഇന്ത്യക്കാര്ക്കും വേദനയുണ്ട്.
വിവാദത്തില് മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശന് ഉള്പ്പടെയുള്ളവര് ഇടപെട്ട രീതി സന്തോഷിപ്പിക്കുന്നതാണ്. ബിഷപ്പിന് പിണറായി വിജയന് ശക്തമായ മുന്നറിയിപ്പ് നല്കിയതില് സന്തോഷമുണ്ട്. തെറ്റായ പ്രചാരണം നടത്തുന്നവരെ വെറുതെവിടില്ലെന്ന മുഖ്യമന്ത്രിയുടെ പ്രസ്താവനയെ പ്രതിപക്ഷ നേതാവ് വി.ഡി. സതീശനും പിന്തുണച്ചു. ഇതില് ഏറെ സന്തോഷമുണ്ട.
ഹിന്ദുമതത്തെ അല്ലെങ്കില് ക്രിസ്തുമതത്തെ ഒരു വശത്തും, മുസ്ലിം മതത്തെ മറുവശത്തും നിര്ത്തി അവിശ്വാസത്തെയും സാമുദായിക സംഘര്ഷത്തെയും ഉത്തേജിപ്പിക്കാനാണ് ഇതിലൂടെ ശ്രമിച്ചതെന്ന ഉദ്ദേശം വ്യക്തമാണ്. വാക്കിലൂടെയോ പ്രവൃത്തിയിലൂടെയോ വിവേചനത്തിന്റെ സൂക്ഷ്മതലങ്ങളിലൂടെയോ പ്രകടിപ്പിക്കുന്ന ഇത്തരം മതഭ്രാന്തിനെ ഒരു മതേതര രാജ്യം തീര്ച്ചയായും അവസാനിപ്പിക്കേണ്ടതാണെന്നും ചിദംബരത്തിന്റെ ലേഖനത്തില് വിമര്ശിക്കുന്നുണ്ട്.
