ന്യൂദല്ഹി: മിസൈല് സാങ്കേതികവിദ്യയില് ഇന്ത്യ പൂര്ണമായും സ്വാശ്രയത്വം കൈവരിച്ചതായി ഡിഫന്സ് റിസര്ച്ച് ആന്ഡ് ഡെവലപ്മെന്റ് ഓര്ഗനൈസേഷന് (ഡിആര്ഡിഒ) ചെയര്മാന് ജി. സതീഷ് റെഡ്ഡി. ഏറ്റവും നൂതനമായ മിസൈലുകള് ഇപ്പോള് രാജ്യത്ത് വികസിപ്പിക്കാനാകും.
ഡിആര്ഡിഒയുടെ ഈ നേട്ടത്തിലേക്കുള്ള വളര്ച്ചയില് മിസൈല്മാന് എന്നറിയപ്പെട്ട മുന് രാഷ്ട്രപതി എ.പി.ജെ. അബ്ദുള്കലാമിന്റെയും മറ്റു ശാസ്ത്രജ്ഞരുടെയും പങ്ക് സുപ്രധാനമായിരുന്നെന്നും അദ്ദേഹം കൂട്ടിച്ചേര്ത്തു. ‘ഇന്ത്യയുടെ ദേശീയ സുരക്ഷയ്ക്കായുള്ള പ്രതിരോധ സാങ്കേതികവിദ്യകള്’ എന്ന വിഷയത്തില് ജവഹര്ലാല് നെഹ്റു സര്വ്വകലാശാലയിലെ സ്കൂള് ഓഫ് എന്ജിനീയറിങ് സംഘടിപ്പിച്ച ഓണ്ലൈന് സെമിനാറില് പ്രഭാഷണം നടത്തുകയായിരുന്നു അദ്ദേഹം.
മിസൈല് നിര്മാണ മേഖലയില് ഇന്ത്യക്ക് ഇനി ഒറ്റയ്ക്ക് മുന്നേറാനാകും. ഈ മേഖലയില് അത്യാധുനിക സാങ്കേതികവിദ്യ വികസിപ്പിക്കുന്നതിനാണ് ശ്രമിക്കുന്നത്. രാജ്യം അഭിവൃദ്ധി പ്രാപിക്കാനും ‘ആത്മനിര്ഭര്’ (സ്വാശ്രയത്വം) കൈവരിക്കണമെങ്കിലും അത്യാധുനിക സാങ്കേതികവിദ്യ വികസിപ്പിക്കണം. ഇക്കാര്യത്തില് അക്കാദമിക സ്ഥാപനങ്ങള്ക്ക് വലിയ പങ്കുവഹിക്കാനുണ്ട്.
ഇന്റഗ്രേറ്റഡ് ഗൈഡഡ് മിസ്സൈല് ഡെവലപ്മെന്റ് പ്രോഗ്രാമിന്റെ (ഐജിഎംഡിപി) ഭാഗമായി പൃഥ്വി, അഗ്നി, ആകാശ്, ത്രിശൂല്, നാഗ് എന്നീ അഞ്ച് മിസൈലുകള് നാം വികസിപ്പിച്ചു. രാജ്യം കൈവരിച്ച സാങ്കേതിക നേട്ടത്തിന്റെ ഉദാഹരണമായിരുന്നു അഗ്നി മിസൈല്. ഇതോടെ ശത്രുമിസൈലിനെ തടയാനും നശിപ്പിക്കാനും ശേഷിയുള്ള മിസൈലുകള് കൈവശമുള്ള രാജ്യങ്ങളുടെ പട്ടികയില് ഇന്ത്യയും ഇടംപിടിച്ചു. ദീര്ഘദൂരവും കൂടുതല് ശേഷിയുമുള്ള നിരവധി മിസൈലുകള് പിന്നെയും പരീക്ഷിച്ചു. എ-സാറ്റ് (ആന്റി സാറ്റലൈറ്റ്) മിസൈല് 2019 മാര്ച്ചില് വിജയകരമായി പരീക്ഷിച്ചതോടെ ഈ സാങ്കേതികത കൈവശമുള്ള യുഎസ്, റഷ്യ, ചൈന തുടങ്ങിയ മുന്നിര രാജ്യങ്ങള്ക്കൊപ്പം ഇന്ത്യയുമെത്തി.
പ്രതിരോധ മേഖലയില് ഡ്രോണ് അധിഷ്ഠിത ആയുധങ്ങള്ക്ക് പുതിയ കാലത്ത് സുപ്രധാന പങ്കാണുള്ളതെന്നും സതീഷ് റെഡ്ഡി ചൂണ്ടിക്കാട്ടി. ഈ മേഖലയിലും ഇന്ത്യ കാര്യമായ ഗവേഷണങ്ങള് നടത്തിക്കൊണ്ടിരിക്കുകയാണ്. ഇപ്പോള്ത്തന്നെ നമ്മുടെ യുവഗവേഷകര് നിരവധി സാങ്കേതികവിദ്യകള് വികസിപ്പിച്ചുകൊണ്ടിരിക്കുകയാണെന്നും അദ്ദേഹം പറഞ്ഞു. യൂണിവേഴ്സിറ്റി വൈസ് ചാന്സലര് എം. ജഗദേഷ് കുമാര്, അധ്യാപകര്, വിദ്യാര്ഥികള് എന്നിവര് സെമിനാറില് പങ്കെടുത്തു.
