തിരുവനന്തപുരം : ക്ലബ് ഹൗസുകളില് ലൈംഗിക ചാറ്റും അധിക്ഷേപങ്ങളും നടത്തുന്ന റൂമുകള് സജീവമെന്ന് പോലീസ്. ക്ലബ് ഹൗസിന് പോലീസ് കര്ശ്ശന നിരീക്ഷണം ഏര്പ്പെടുത്തി. പാലാ ബിഷപ്പിന്റെ നര്ക്കോട്ടിക് ജിഹാദ് പരാമര്ശത്തിന് പിന്നാലെ സാമൂഹ്യ മാധ്യമങ്ങളില് കഴിഞ്ഞ ഒരാഴ്ചയായി പോലീസിന്റെ നിരീക്ഷണത്തിലാണ്. ഇതിനെ തുടര്ന്നാണ് ഈ സമൂഹ മാധ്യമത്തില് തീവ്രസ്വഭാവമുള്ളവരുടെ സാന്നിധ്യം കണ്ടെത്തിയത്.
സമൂഹ മാധ്യമങ്ങള് വഴി ജാതി, മതസ്പര്ധ വളര്ത്തുന്ന സന്ദേശങ്ങള് പ്രചരിപ്പിക്കുന്നവരെ പിടികൂടാന് പോലീസിന് നിര്ദ്ദേശം നല്കിയിരുന്നു. ഇതിന്റെ ഭാഗമായാണ് ക്ലബ് ഹൗസ് ചാറ്റ് റൂമുകളില് പോലീസ് നിരീക്ഷണം ശക്തമാക്കിയത്. തുടര്ന്ന ഇതില് തീവ്ര സ്വഭാവമുള്ളവരുടെ സാന്നിധ്യമുള്ളതായും ലൈംഗിക ചാറ്റും അധിക്ഷേപങ്ങളും നടത്തുന്നവരുടെ റൂമുകള് ഉള്ളതായും കണ്ടെത്തിയിട്ടുണ്ട്.
ഇതിനെ തുടര്ന്ന് അഡ്മിന്മാരെ കണ്ടെത്തി നടപടി സ്വീകരിക്കാനാണ് തീരുമാനം. ഇതിനായി സൈബര് സെല് നിരീക്ഷണം ആരംഭിച്ചു. വരും ദിവസങ്ങളില് ഇവര്ക്കെതിരെ കൂടുതല് നടപടികളിലേക്ക് നീങ്ങുമെന്ന് പോലീസ് വ്യക്തമാക്കി.
