കൊച്ചി : ചന്ദ്രിക ദിനപ്പത്രത്തിന്റെ അക്കൗണ്ടില് നിന്നും പണം പിന്വലിച്ചത് ജീവനക്കാരുടെ പിഎഫ് വിഹിതവും ശമ്പളവും നല്കാനെന്ന് വിശദീകരണം. കള്ളപ്പണ ഇടപാട് കേസില് ഫിനാന്സ് മാനേജര് സമീറിനെ എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്തിരുന്നു. സമീര് നല്കിയ മൊഴിയിലാണ് പണം പിന്വലിച്ചത് ജീവനക്കാര്ക്ക് വേണ്ടിയാണെന്ന് അറിയിച്ചത്.
പാലാരിവട്ടം മേല്പ്പാലം അഴിമതി വഴി ലഭിച്ച കള്ളപ്പണം വെളുപ്പിക്കാന് ചന്ദ്രിക ദിനപത്രം ഉപയോഗിച്ചെന്ന പരാതിയില് ഹൈക്കോടതി നിര്ദ്ദേശപ്രകാരമാണ് എന്ഫോഴ്സ്മെന്റ് കേസെടുത്ത് ചോദ്യം ചെയ്തത്. ചന്ദ്രികയുടെ അക്കൗണ്ടില് നിന്നും നടത്തിയ സാമ്പത്തിക ഇടപാടുകളുടെ രേഖകളും സമീര് ഇഡിക്ക് മുമ്പാകെ ഹാജരാക്കിയിട്ടുണ്ട്. അതേസമയം കേസുമായി ബന്ധപ്പെട്ട് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടിയോടും ഇഡിക്ക് മുമ്പാകെ ഹാജരാകാന് ആവശ്യപ്പെട്ടിട്ടുണ്ട്.
ചന്ദ്രികയുടെ അക്കൗണ്ട് വഴി വെളുപ്പിച്ച കള്ളപ്പണം ഉപയോഗിച്ച് പാണക്കാട് കുടുംബത്തിലെ ആളുകളുടെ പേരില് ഭൂമി വാങ്ങിയെന്നും എന്ഫോഴ്സ്മെന്റിന് പരാതി ലഭിച്ചിട്ടുണ്ട്. കുഞ്ഞാലിക്കുട്ടിയുടെ മകന് ആഷിക് കള്ളപ്പണം വെളുപ്പിക്കാന് കൂട്ടുനിന്നെന്നും ആരോപണമുണ്ട്.
എന്നാല് ഇന്ന് ഇഡിയ്ക്ക് മുന്നില് ഹാജരാകുന്നതിന് ചില പ്രയാസം ഉണ്ടെന്നും മറ്റൊരു ദിവസം നല്കണം എന്നുമാണ് കുഞ്ഞാലിക്കുട്ടി ഉദ്യോഗസ്ഥരെ അറിയിച്ചിട്ടുള്ളത്. ഇതിന് മുമ്പ് ഒരു തവണ അന്വേഷണ സംഘം കുഞ്ഞാലിക്കുട്ടിക്ക് സമയം നീട്ടി നല്കിയിട്ടുണ്ട്.
