മുംബൈ: അഫ്ഗാനിസ്ഥാനിലെ താലിബാന്റെ കാടന് ഭരണത്തില് കലാകാരന്മാര് കൊല്ലപ്പെടുന്നത് അടക്കം വിഷയങ്ങളില് ബോളിവുഡിലെ സൂപ്പര്താരങ്ങളായ ഷാരൂഖ് ഖാന്, സല്മാന് ഖാന്, അമീര് ഖാന് എന്നിവര് പ്രതികരിക്കാത്തത് എന്തെന്ന ചോദ്യം വിവിധ കോണുകളില് നിന്ന് നിരന്തരം ഉയര്ന്നിരുന്നു. എന്നാല്, അഫ്ഗാനിസ്ഥാനില് താലിബാന് അധികാരത്തിലേറിയതില് ഇന്ത്യയില് ചില മുസ്ലിങ്ങള് ആഘോഷം നടത്തിയതിനെ രൂക്ഷമായി വിമര്ശിച്ച നടനാണ് നസിറുദ്ദീന് ഷാ. ഷാ തന്നെ ഇപ്പോള് ഒരു ഓണ്ലൈന് മാധ്യമത്തിന് നല്കിയ അഭിമുഖത്തില് എന്തുകൊണ്ടാണ് മൂന്നു ഖാന്മാര് വിഷയത്തില് പ്രതികരിക്കാത്തതെന്ന് വെളിപ്പെടുത്തുകയാണ്.
അത്തരത്തില് ഒരു പ്രതികരണമുണ്ടാകാത്തത് വ്യക്തമായും അവര് നേരിടേണ്ടിവരുന്ന പീഡനത്തിന്റെ വ്യാപ്തി അവര്ക്കു ബോധ്യമുള്ളത് കൊണ്ടാണ്. എനിക്ക് അവര്ക്കുവേണ്ടി സംസാരിക്കാന് കഴിയില്ല, പക്ഷേ അവര്ക്ക് നഷ്ടപ്പെടാന് ഒരുപാട് ഉണ്ടെന്ന് എനിക്ക് സങ്കല്പ്പിക്കാന് കഴിയും. അവര് സാമ്പത്തികമായി മാത്രമല്ല, എല്ലാത്തരം പീഡനങ്ങള്ക്കും വിധേയരാകും. അവരുടെ മുഴുവന് സ്ഥാപനങ്ങളും ഉപദ്രവിക്കപ്പെടുമെന്നും നസിറുദ്ദീന് ഷാ.
