മറയൂര്: പ്രണയത്തിലായിരുന്ന കമിതാക്കള് ആത്മഹത്യക്ക് ശ്രമിച്ചു. ആത്മഹത്യ ചെയ്ത യുവാവിന്റെ മൃതദേഹം 150 അടി താഴ്ചയിലുള്ള മുള്ക്കാട്ടില് നിന്നും കണ്ടെടുത്തു. പെരുമ്പാവൂര് മാറമ്പള്ളി നാട്ടുകല്ലുങ്കല് നാദിര്ഷാ അലി(30) യെയാണ് മരിച്ച നിലയില് കണ്ടെത്തിയത്. ഗുരുതരമായി രക്തം വാര്ന്ന നിലയില് കണ്ട മറയൂര് സ്വദേശിനിയും അധ്യാപികയുമായ നിഖില തോമസ് (26) കോലഞ്ചേരി മെഡിക്കല് കോളേജില് പ്രവേശിപ്പിച്ചു.
മറയൂരിലെ സ്വകാര്യ സ്കൂളിലെ അധ്യാപികയും ഇതേ സ്കൂളില് ഡാന്സ് പരിശീലകരോടൊപ്പം എത്തിയ യുവാവും തമ്മില് മൂന്ന് വര്ഷമായി പ്രണയത്തിലായിരുന്നു. ഇന്നലെ യുവതിയെ കാണാനായി നാദിര്ഷാ മറയൂരില് എത്തി. രാവിലെ 10 മണി വരെ ഓണ് ലൈന് ക്ലാസ് നടത്തിയിരുന്ന അധ്യാപിക അതിന് ശേഷം യുവാവിനൊപ്പം പോയതെന്നാണ് വിവരം. കാറുമായി എത്തിയ യുവാവിനൊപ്പം ചുറ്റി കറങ്ങിയ ശേഷം കാന്തല്ലൂരിലെ ഭ്രമരം പോയിന്റില് എത്തി. വിവാഹത്തിന് വീട്ടുകാര് സമ്മതിക്കില്ലെന്നും അതിനാല് ആത്മഹത്യ ചെയ്യുകയാണെന്ന് അറിയിച്ച് ഇരുവരും ചേര്ന്ന് വീഡിയോ ചിത്രീകരിച്ച് സുഹുത്തുക്കള്ക്ക് അയച്ച ശേഷമാണ് ആത്മഹത്യക്ക് ശ്രമിച്ചതെന്ന് കരുതുന്നു. സംഭവസ്ഥലത്ത് നിന്നും കൈകള് മുറിക്കാന് ഉപയോഗിച്ച ബ്ലെയ്ഡ്, മദ്യകുപ്പി, ഇരുവരുടെയും ചെരുപ്പുകള്, വസ്ത്രം, മൊബൈല് ഫോണ് എന്നിവ രക്തത്തില് കുതിര്ന്ന നിലയില് കണ്ടെത്തി.
സ്ഥലത്തെത്തിയ വിനോദ സഞ്ചാരികള് താഴെ ഭാഗത്ത് യുവതിയുടെ ശബ്ദം കേള്ക്കുന്നതായി പറഞ്ഞതോടെ പ്രദേശവാസികളാണ് ഇവരെ കണ്ടെത്തിയത്. യുവതിയുടെ അടുത്തെത്തിയ സമയത്താണ് പാറയ്ക്ക് താഴെ ആള് വീണീട്ടുണ്ടെന്ന് പറയുന്നത്. മറയൂരില് എത്തിച്ച യുവതിയുടെ നില ഗുരുതരമായതിനാല് കോലഞ്ചേരിക്ക് കൊണ്ടുപോയി.
മറയൂര് പോലീസിന്റെ നേതൃത്വത്തില് കുളച്ചിവയല് വനവാസി കുടിയിലെ യുവാക്കളുടെ സഹായത്തോടെ മൂന്ന് മണിക്കൂറോളം നീണ്ട തിരച്ചിലിനൊടുവിലാണ് വൈകിട്ട് 6 മണിയോടെ യുവാവിന്റെ മൃതദേഹം കണ്ടെടുത്തത്.
