കോട്ടയം : ഏറ്റുമാനൂര്‍ ക്ഷേത്രത്തിലെ തിരുവാഭരണം കാണാതായതല്ല മറിച്ച് മോഷണം പോയതാണെന്ന് ദേവസ്വം വിജിലന്സ്. വിഗ്രഹത്തില്‍ നിത്യവും ചാര്‍ത്തിയിരുന്ന രുദ്രാക്ഷ മാലയിലെ ഒമ്പത് മുത്തുകള്‍ കാണാതായെന്നതാണ് കേസ്. എന്നാല്‍ 81 മുത്തുകള്‍ ഉണ്ടായിരുന്ന മാല മാറ്റി പകരം മറ്റൊരു മാല വെച്ചതാണെന്നാണ് ദേവസ്വം ബോര്‍ഡ് വിജിലന്സ് നടത്തിയ അന്വേഷണത്തില്‍ കണ്ടെത്തിയിട്ടുണ്ട്.
വിജിലന്സ് എസ്പി പി. ബിജോയ് നടത്തിയ അന്വേഷണത്തില്‍ സംഭവം ഉന്നതാധികാരികളെ അറിയിക്കുന്നതില്‍ ഉദ്യോഗസ്ഥര്‍ക്ക് വീഴ്ച പറ്റിയെന്നും കുറ്റപ്പെടുത്തുന്നുണ്ട്. നിലവിലെ മാല സംബന്ധിച്ച് ദേവസം രേഖകളില്‍ ഒന്നുമില്ലെന്നും പറയുന്നുണ്ട്. 81 മുത്തുകളുള്ള 23 ഗ്രാം തൂക്കമുള്ള സ്വര്‍ണംകെട്ടിയ രുദ്രാക്ഷമാലയാണ് ദേവസ്വം ബോര്‍ഡിന്റെ രേഖകളിലുള്ളത്.
ഇതിന് പകരം 72 മുത്തുകളുള്ള 21 ഗ്രാം തൂക്കമുള്ള മറ്റൊരു മാലയാണ് ഇപ്പോഴുള്ളത്. പഴയ മാലയില്‍ നിന്നും രുദ്രാക്ഷം അടര്‍ത്തി മാറ്റിയതാണോ അതോ പഴയ മാല മാറ്റി പുതിയതു വച്ചതാണോ എന്നിങ്ങനെ രണ്ട് കാര്യങ്ങളാണ് വിജിലന്സ് അന്വേഷിച്ചത്. എന്നാല്‍ യഥാര്‍ത്ഥ മാല മോഷ്ടിച്ച ശേഷം മറ്റൊരു മാല പകരം വെച്ചതാണെന്ന് അന്വേഷണത്തില്‍ കണ്ടെത്തി. കേസില്‍ ആദ്യം അന്വേഷണം നടത്തിയ പോലീസിന്റെ പ്രാഥമിക നിഗമനവും ഇത് തന്നെയായിരുന്നു.
അതേസമയം സംഭവത്തില്‍ അന്വേഷണം നടത്തിയ തിരുവാഭരണ കമ്മിഷണര്‍ എസ്. അജിത്കുമാറിന്റെ കണ്ടെത്തല്‍ പൂര്‍ണമായും തള്ളുന്നതാണ് വിജിലന്സ് അന്വേഷണ റിപ്പോര്‍ട്ട്. മാലയിലെ ഒന്‍പത് മുത്തുകള്‍ മാത്രമാണ് നഷ്ടപ്പെട്ടതെന്നായിരുന്നു തിരുവാഭരണ കമ്മിഷണറുടെ കണ്ടെത്തല്‍. അളവിലും തൂക്കത്തിലും വന്ന വ്യത്യാസം ക്ലറിക്കല്‍ പിഴവാണെന്നുമായിരുന്നു വിശദീകരണം. മാല മോഷണം പോയ വിവരം നേരത്തെ അറിഞ്ഞ തിരുവാഭരണ കമ്മിഷണറും ദേവസ്വം ബോര്‍ഡ് പ്രസിഡന്‍ിനെ വിവരം അറിയിച്ചിരുന്നില്ല.
പഴയ മാല നിര്‍മിച്ച സ്വര്‍ണപണിക്കാര്‍ ഉള്‍പ്പെടെയുള്ളവരുടെ മൊഴിയുടെ അടിസ്ഥാനത്തിലും ദേവസ്വം ബോര്‍ഡിലെ രേഖകളും പരിശോധിച്ചാണ് മോഷണം സ്ഥിരീകരിച്ചത്. മാലയുടെ സൂക്ഷിപ്പ് ചുമതലയുണ്ടായിരുന്ന മുന്‍ മേല്‍ശാന്തിയുടെ ഭാഗത്ത് ഗുരുതര വീഴ്ചയാണ് സംഭവിച്ചതെന്നും റിപ്പോര്‍ട്ടിലുണ്ട്. സംഭവം മൂടിവെയ്‌ക്കാനും ക്ഷേത്രത്തിന്റെ ചുമതലയുള്ള ദേവസ്വം ബോര്‍ഡ് ഉദ്യോഗസ്ഥരുടെ ഭാഗത്തു നിന്ന് ശ്രമമുണ്ടായി. ഇത് ദുരൂഹതയുണര്‍ത്തുന്നതാണ്. ഇതുസംബന്ധിച്ച പോലീസിന്റെ ശാസ്ത്രീയ അന്വേഷണം കൂടി പൂര്‍ത്തിയാകുന്നതോടെ കൂടുതല്‍ തെളിവുകള്‍ പുറത്തുവരും
പ്രതികരിക്കാൻ ഇവിടെ എഴുതുക: