‘മേഖലയുടെ പ്രധാനപ്പെട്ട ഭാ​ഗം’; ഇന്ത്യയുമായി മികച്ച ബന്ധം ആ​ഗ്രഹിക്കുന്നുവെന്ന് താലിബാൻ, വക്താവിന്റെ പ്രതികരണം പാക്ക് ചാനലിനോട്

കാബൂൾ: ഇന്ത്യയുൾപ്പെടെയുള്ള എല്ലാ രാജ്യങ്ങളുമായും മികച്ച ബന്ധമാണ് താലിബാൻ ആഹ്രഹിക്കുന്നതെന്നും അഫ്​ഗാൻ മണ്ണ് മറ്റൊരു രാജ്യത്തിനതിരെയും ഉപയോ​ഗിക്കാൻ അനുവദിക്കില്ലെന്നും വ്യക്തമാക്കി ഭീകരസംഘടനയുടെ ഉന്നത നേതൃത്വം. മേഖലയുടെ പ്രധാനപ്പെട്ട ഭാ​ഗമായാണ് ഇന്ത്യയെ പരി​ഗണിക്കുന്നതെന്നും താലിബാൻ വക്താവ് സബിയുള്ള മുജാഹിദ് കൂട്ടിച്ചേർത്തു. 

‘ഇന്ത്യയുൾപ്പെടെ എല്ലാ രാജ്യങ്ങളുമായും മികച്ച ബന്ധം ഞങ്ങൾ ആ​ഗ്രഹിക്കുന്നു. അഫ്​ഗാൻ ജനതയുടെ താത്പര്യങ്ങൾക്ക് അനുസരിച്ചുള്ള നയം ഇന്ത്യ ആവിഷ്ക്കരിക്കണമെന്നാണ് ‍ഞങ്ങളുടെ ആ​ഗ്രഹം’.- പാക്കിസ്ഥാന്റെ എആർവൈ വാർത്താചാനലിനോട് ബുധനാഴ്ച മുജാഹിദ് പറഞ്ഞു. 

യുഎസിന്റെ നേതൃത്വത്തിലുള്ള സഖ്യരാജ്യങ്ങളുടെ സൈന്യത്തിന്റെ പിൻമാറ്റം പൂർത്തിയാകാൻ രണ്ടാഴ്ച ശേഷിക്കെ, ഓ​ഗസ്റ്റ് 15-നാണ് താലിബാൻ അഫ്​ഗാനിസ്ഥാന്റെ ഭരണം പിടിച്ചെടുത്തത്. സഖ്യരാജ്യങ്ങൾ ആയുധങ്ങളും പരിശീലനവും നൽകിയ അഫ്​ഗാൻ പ്രതിരോധ സേനയുടെ ചെറുത്തുനിൽപ്പ് ദുർബലമായിരുന്നതിനാൽ ഏതാനും ദിവസങ്ങൾക്കൊണ്ട് പ്രധാനപ്പെട്ട ഭൂരിഭാ​ഗം ന​ഗരങ്ങളും കൈവശപ്പെടുത്തി. 

‘മറ്റൊരു രാജ്യത്തിനെതിരെയും ഞങ്ങളുടെ മണ്ണ് ഉപയോ​ഗിക്കാൻ അനുവദിക്കില്ലെന്ന് ഞങ്ങൾ നേരത്തേ വ്യക്തമാക്കിയിട്ടുണ്ട്. ഞങ്ങളുടെ നയം വ്യക്തമാണ്’- തെഹ്രീകി താലിബാൻ പാക്കിസ്ഥാനും(ടിടിപി) അഫ്​ഗാനിസ്ഥാനിലെ ഇസ്ലാമിക് സ്റ്റേറ്റും ശക്തിപ്പെടാനുള്ള സാധ്യതയെക്കുറിച്ച് ചോദിച്ചപ്പോൾ മുജാ​ഹിദ് പറഞ്ഞു. 

അയൽ രാജ്യങ്ങളായതിനാലും താത്പര്യങ്ങൾ പരസ്പരം ബന്ധപ്പെട്ട് കിടക്കുന്നതിനാലും തർക്കമുള്ള എല്ലാ വിഷയങ്ങളും ഇന്ത്യയും പാക്കിസ്ഥാനും ചർച്ചയിലൂടെ പരിഹരിക്കണമെന്ന കാഴ്‌ച്ചപ്പാടാണ് മുജാഹിദിനുള്ളതെന്നും ചാനൽ പറയുന്നു.