കൊച്ചി : കെട്ടിട നിര്മാണത്തിനുള്ള പണം വകമാറ്റിയെന്ന് ആരോപണത്തില് ചേമ്പര് ഓഫ് കൊമേഴ്സില് എന്ഫോഴ്സ്മെന്റ് ഡയറക്ട്രേറ്റ് തെരച്ചില് നടത്തി. കേരള ട്രേഡ് സെന്റര് നിര്മാണത്തിനായി അഡ്വാന്സ് വാങ്ങിയ തുക മുന് ഭാരവാഹികള് വകമാറ്റി ചെലവഴിച്ചതായാണ് ആരോപണം.
ചേമ്പര് ഓഫ് കൊമേഴ്സ് മുന് ഭാരവാഹികള് കെട്ടിട നിര്മാണത്തിനെന്ന പേരില് കോടികള് അഡ്വാന്സ് വാങ്ങിയിരുന്നു. ഈ പണം സ്ഥാപനത്തിന്റെ അക്കൗണ്ടില് സൂക്ഷിക്കാതെ വകമാറ്റി ചെലവഴിച്ചതായി പരാതി ലഭിച്ചതിനെ തുടര്ന്നാണ് എന്ഫോഴ്സ്മെന്റ് തെരച്ചില് നടത്തിയത്.
കടകള് അനുവദിക്കാമെന്ന് വാഗ്ദാനം നല്കി ചേമ്പര് ഓഫ് കൊമേഴ്സ് മുന് പ്രസിഡന്റ് മന്സൂര് പലരില് നിന്നും പണം വാങ്ങിയെന്നും നിലവിലെ ഭാരവാഹികള് ആരോപിച്ചു. ഇത് സംബന്ധിച്ചും അന്വേഷണം നടത്തുന്നുണ്ട്.
