കൊല്ലം: ലോക്ഡൗണ് നിയന്ത്രണങ്ങളില് ജീവിതം വഴിമുട്ടി അതിജീവനത്തിന് ശേഷിയില്ലാതെ ജീവനൊടുക്കുന്നവരുടെ എണ്ണം സംസ്ഥാനത്ത് വര്ധിക്കുന്നു. രണ്ടാംഘട്ട ലോക്ഡൗണ് തുടങ്ങിയശേഷം സംസ്ഥാനത്ത് 18 പേരാണ് ജീവനൊടുക്കിയത്. കൊല്ലം കുണ്ടറയില് കല്ലു ലൈറ്റ് ആന്ഡ് സൗണ്ട് ഉടമ സുമേഷാണ് ഏറ്റവും ഒടുവില് ജീവനൊടുക്കിയത്. സാമ്പത്തിക ബാധ്യതയാണ് ആത്മഹത്യക്ക് കാരണം.
തലസ്ഥാനത്ത് നന്തന്കോട്ട് സ്വര്ണപ്പണിക്കാരന് മനോജ്, ഭാര്യ രഞ്ജു, മകള് അമൃത എന്നിവരാണ് 18 പേരില് ആദ്യം ജീവനൊടുക്കിയവര്. ഇടുക്കിയിലെ പാമ്പാടുംപാറ ഏലം കര്ഷകന് സന്തോഷ്, തിരുവനന്തപുരം ഗൗരീശപട്ടം ലൈറ്റ് ആന്ഡ് സൗണ്ട്സ് ഉടമ നിര്മല് ചന്ദ്രന്, ആലപ്പുഴ മാന്നാര് വിഷ്ണു പ്രസാദ്, ലൈറ്റ് ആന്ഡ് സൗണ്ട്സ് ഉടമ പാലക്കാട് വെണ്ണക്കരയിലെ പൊന്നുമണി, ഇടുക്കി അടിമാലി ഇരുമ്പുപാലത്ത് ബേക്കറിയുടമ വിനോദ്, തൃശ്ശൂരില് ഡ്രൈവര് ശരത്, അച്ഛന് ദാമോദരന്, വയനാട് അമ്പലവയലില് ബസ്സുടമ പി.സി. രാജാമണി, തിരുവനന്തപുരം തച്ചോട്ടുകാവിലെ സ്റ്റേഷനറിക്കടയുടമ എസ്. വിജയകുമാര്, പാലക്കാട് പല്ലശന ചെറുകിട കര്ഷകന് കണ്ണന്കുട്ടി, കൊല്ലം കൊട്ടിയത്ത് മോഹനന് പിള്ള, തിരുവനന്തപുരം വിളപ്പില്ശാല ക്ഷീരകര്ഷകന് ശ്രീകാന്ത്, കോട്ടയം കല്ലറ ടൂറിസ്റ്റ് ബസ്സുടമ വി. മോഹനന്, വടകരയില് ചായക്കടയുടമ മേപ്പയില് തയ്യുള്ളതില് കൃഷ്ണന് എന്നിവരാണ് ജീവനൊടുക്കിയ മറ്റ് 17 പേര്.
ജീവനോപാധി നഷ്ടപ്പെട്ടതിന്റെ വേദനയിലാണ് എല്ലാവരും ജീവനൊടുക്കിയത്. ഒപ്പമുണ്ടാകുമെന്നു പറഞ്ഞ സര്ക്കാര് ഒപ്പമില്ലാത്തതും ആശ്വാസത്തിനുപോലും ഒന്നും ചെയ്യാത്തതുമാണ് ഇത്രയേറെ പേരുടെ ജീവന് നഷ്ടപ്പെടാന് കാരണമായത്. കൊവിഡ് പ്രതിരോധത്തിന്റെ പേരില് സംസ്ഥാന സര്ക്കാര് നടപ്പാക്കിയ അശാസ്ത്രീയ നിയന്ത്രണങ്ങള് സാധാരണക്കാരായ കര്ഷകന്റെയും ദിവസവേതനക്കാരന്റെയും ചെറുകിട കച്ചവടക്കാരുടെയും ജീവിതം കൊടുംദുരിതത്തിലാക്കി.
രണ്ടാം തരംഗത്തോടെ ലോക്ഡൗണ് സംസ്ഥാന സര്ക്കാരാണ് നേരിട്ട് നിയന്ത്രിക്കുന്നത്. മേയ് മാസത്തില് ആരംഭിച്ച സംസ്ഥാന സര്ക്കാരിന്റെ അശാസ്ത്രീയ നിയന്ത്രണങ്ങള് കാരണം വലിയ വിമര്ശനങ്ങളാണ് നേരിടുന്നത്. വ്യാപാര, തൊഴില് മേഖലകളില് സാമ്പത്തിക പ്രതിസന്ധി രൂക്ഷമായി.
മറ്റു സംസ്ഥാനങ്ങള് സാമ്പത്തിക പ്രതിസന്ധി നേരിടാന് കരുതലെടുത്തപ്പോള് കേരളം ഒന്നും ചെയ്തില്ലെന്നാണ് വിമര്ശനം. ലോക്ഡൗണ് ഏറ്റവും കൂടുതല് ബാധിച്ചത് അത്യാവശ്യ സേവനമല്ലാത്ത ലൈറ്റ് ആന്ഡ് സൗണ്ട് മേഖലകള് പോലുള്ള വിഭാഗങ്ങളെയാണ്. അവര്ക്ക് ലോക്ഡൗണ് കാലത്ത് ഒന്നും ചെയ്യാനില്ലായിരുന്നു എന്നു മാത്രമല്ല ഏറെ പ്രതീക്ഷയോടെ കാത്തിരുന്ന ഓണക്കാലവും നഷ്ടത്തിന്റേതായിരുന്നു.
അത്യാവശ്യ സേവനങ്ങളല്ലാത്ത ഇത്തരം നിരവധി സംരംഭകര് ഇനിയും ലോക്ഡൗണ് ഏല്പ്പിച്ച കടക്കെണിയില് നിന്ന് കരകയറാനാകാതെ മുങ്ങിത്താഴുകയാണ്. ബാങ്കുകളില് നിന്നും സ്വകാര്യപണമിടപാട് സ്ഥാപനങ്ങളില് നിന്നുമെടുത്ത വായ്പകള് തിരിച്ചടയ്ക്കാനാകാതെ വട്ടം കറങ്ങുകയാണ് ഇവര്. ഒരു കൈസഹായം ചെയ്യാന് സര്ക്കാരിനുമാകുന്നില്ല.
ജന്മഭൂമി ഓണ്ലൈന്