ടോക്കിയോ: വനിതകളുടെ ഡിസ്കസ് ത്രോയില് ഇന്ത്യന് പ്രതീക്ഷയായിരുന്ന കമല്പ്രീത് കൗറിന് മെഡല് നേടാനായില്ല. ഫൈനലില് നടന്ന കടുത്ത മത്സരത്തില് 63.70 ദൂരം കുറിച്ച താരം ആറാം സ്ഥാനക്കാരിയായി ഫിനീഷ് ചെയ്തു. ഫൈനലില് ആദ്യ മൂന്ന് ശ്രമങ്ങളില് തന്നെ 63.70 കടന്ന താരം അവസാന എട്ടില് ഇടം പിടിച്ചിരുന്നു. ഇതിന് പിന്നാലെ ലഭിച്ച മൂന്ന് ശ്രമങ്ങളില് ഒരിക്കല് പോലും 65 കടക്കാനായില്ല.
കമല്പ്രീതിന്റെ മികച്ച സമയം 66ന് മുകളിലാണ്. ദേശീയ റെക്കോഡും താരം കുറിച്ചിരുന്നു. ഈ പ്രകടനം ഒളിമ്പിക്സില് ആവര്ത്തിച്ചിരുന്നെങ്കില് ഇന്ത്യന് താരത്തിന് വെള്ളിയോ വെങ്കലമോ നേടാമായിരുന്നു. അമേരിക്കയുടെ അല്മാനാണ് സ്വര്ണം നേടിയത്. 68.98 മീറ്റര് ദൂരം കണ്ടെത്തിയാണ് സ്വര്ണം നേടിയത്. ആദ്യ ശ്രമത്തില് തന്നെ അല്മാന് 68.98ല് എത്തി. 66.86 മീറ്റര് എറിഞ്ഞ ജര്മനിയുടെ പുഡന്സ് വെള്ളിയും 65.72 മീറ്റര് എറിഞ്ഞ ക്യൂബയുടെ പെരസ് വെങ്കലവും നേടി. ഇടക്ക് മഴ പെയ്തതോടെ മത്സരം നിര്ത്തിവച്ചിരുന്നു. ഇതിന് ശേഷം ജര്മ്മന് താരത്തിനൊഴികെ മറ്റാര്ക്കും മികവ് പുലര്ത്താനായില്ല.
ജന്മഭൂമി ഓണ്ലൈന്