ആലപ്പുഴ : സാക്ഷരതാ മിഷന്‍ നടത്തുന്ന ഹയര്‍ സെക്കന്‍ഡറി തുല്യതാ പരീക്ഷയില്‍ ജില്ലയില്‍ നിന്നുള്ള 1,559 പേര്‍ പരീക്ഷ എഴുതും. 26 മുതല്‍ 31 വരെ നടക്കുന്ന പരീക്ഷയില്‍ ഒന്നാം വര്‍ഷം വിജയിച്ച പഠിതാക്കളുടെ രണ്ടാം വര്‍ഷ പരീക്ഷയും ഒന്നാം വര്‍ഷ പഠനം പൂര്‍ത്തിയായവര്‍ക്കുള്ള ഒന്നാം വര്‍ഷ പരീക്ഷയുമാണ് നടക്കുക.
ഒന്നാം വര്‍ഷ പരീക്ഷയ്‌ക്ക് 762 പേരും രണ്ടാം വര്‍ഷ പരീക്ഷയ്‌ക്ക് 797 പേരുമാണ് രജിസ്റ്റര്‍ ചെയ്തിരിക്കുന്നത്.പഠിതാക്കളില്‍ 1022 പേര്‍ സ്ത്രീകളാണ്. എസ്‌സി വിഭാഗത്തില്‍പ്പെട്ട 230പേരും എസ്.ടി. വിഭാഗത്തില്‍പ്പെട്ട രണ്ട് പേരുമുണ്ട്.
എട്ട് ഹയര്‍ സെക്കണ്ടറി സ്‌കൂളുകളാണ് തുല്യതാ പരീക്ഷകള്‍ക്കായി തയ്യാറാക്കിയിട്ടുള്ളത്. കായംകുളം ഗവ.ഗേള്‍സ് ഹയര്‍ സെക്കണ്ടറി സ്‌കൂളിലാണ് കൂടുതല്‍ പേര്‍ പരീക്ഷ എഴുതുന്നത്. ഇവിടെ 374 പേരാണ് പരീക്ഷ എഴുതുക. 99 പേരുള്ള ഹരിപ്പാട് ഗവ.ഗേള്‍സ് ഹയര്‍ സെക്കണ്ടറി സ്‌കൂളിലാണ് ഏറ്റവും കുറവ് ആളുകള്‍ പരീക്ഷ എഴുതുന്നത്.
ഹ്യുമാനിറ്റീസ്, കൊമേഴ്‌സ് ഗ്രൂപ്പുകള്‍ മാത്രമാണ് തുല്യതാ കോഴ്‌സിലുള്ളത്. പത്താം തരം വിജയിച്ച 22 വയസ് പൂര്‍ത്തിയായവര്‍ക്കാണ് തുല്യതാ കോഴ്‌സില്‍ ചേരാന്‍ അര്‍ഹത. പുതിയ ബാച്ചിന്റെ ഓണ്‍ലൈന്‍ ക്ലാസുകളും ആരംഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: