തിരുവനന്തപുരം: നഗരസഭയിലെ പട്ടികജാതി ക്ഷേമ ഫണ്ട് തട്ടിപ്പ് കേസ് അട്ടിമറിക്കാന്‍ സംസ്ഥാന സര്‍ക്കാരും, സിപിഎം നേതൃത്വവും ശ്രമിക്കുകയാണെന്ന് ബിജെപി സംസ്ഥാന ജനറല്‍ സെക്രട്ടറി അഡ്വ.പി സുധീര്‍. 2016 മുതല്‍ പട്ടികജാതി വിഭാഗത്തിലെ ഭവന രഹിതര്‍ക്ക് വീട് വക്കാനും, വിവാഹ സഹായത്തിനും, പഠന ചെലവിനുമെല്ലാമായി അനുവദിച്ച കോടികളാണ് സിപിഎമ്മിന്റെ ഉദ്യോഗസ്ഥ – ഭരണ നേതൃത്വങ്ങള്‍ ഒരുമിച്ച് തട്ടിയെടുത്തത്. ഈ തട്ടിപ്പില്‍ സിപിഎമ്മിന്റെ ഉന്നത നേതാക്കള്‍ക്ക് പങ്കുണ്ട്. പാര്‍ട്ടി നോമിനികളായി നിയമിച്ച എസ്‌സി പ്രമോട്ടര്‍മാര്‍ വഴിയാണ് സിപിഎം നേതാക്കള്‍ പണം തട്ടിയെടുത്തത്. ഫണ്ട് തട്ടിപ്പ് കേസില്‍ ഡിവൈഎഫ്‌ഐ സംസ്ഥാന കമ്മിറ്റി അംഗം പ്രതിന്‍ സാജ് കൃഷ്ണക്ക് ബന്ധമുണ്ടെന്ന വ്യക്തമായ തെളിവുകള്‍ പുറത്തു വന്നിട്ടും അദ്ദേഹത്തെ ചോദ്യം ചെയ്യാനോ, പ്രതി ചേര്‍ക്കാനോ പോലീസ് തയ്യാറായിട്ടില്ല.
ട്രഷറിയില്‍ നിന്ന് നേരിട്ടാണ് എസ്‌സി ഫണ്ട് ഡിവൈഎഫ്‌ഐ നേതാവിന്റെ അമ്മയുടേയും, അഛന്റെയും ബാങ്ക് അക്കൗണ്ടുകളിലേക്ക് പോയത്. ഇത്തരത്തില്‍ നിരവധി സിപിഎം / ഇടത് യൂണിയന്‍ നേതാക്കളുടെ അക്കൗണ്ടിലേക്ക് എസ്‌സി ഫണ്ട് പോയിട്ടുണ്ട്. വ്യക്തമായ തെളിവുകള്‍ പുറത്തു വന്നിട്ടും ഇക്കാര്യങ്ങള്‍ പോലീസ് അന്വേഷിക്കുന്നില്ല. മുന്‍ മേയര്‍മാരായ വി.കെ. പ്രശാന്തിനും, കെ.ശ്രീകുമാറിനും ഫണ്ട് തട്ടിപ്പില്‍ പങ്കുണ്ട്. അവരുടെ കാലത്ത് നിരവധി സിപിഎം പ്രവര്‍ത്തകരെയാണ് മാനദണ്ഡങ്ങള്‍ പോലും പാലിക്കാതെ തട്ടിപ്പിനു വേണ്ടി മാത്രം എസ്‌സി പ്രമോട്ടര്‍മാരായി നിയമിച്ചത്. തട്ടിപ്പില്‍ മുന്‍ മേയര്‍മാരുടെ പങ്ക് അന്വേഷിക്കണം. അവരെ ചോദ്യം ചെയ്യണം.
സിപിഎം /ഡിവൈഎഫ്‌ഐ നേതാക്കളെ രക്ഷിക്കാനും, സിപിഎം നേതൃത്വത്തിന്റെ പങ്ക് പുറത്തു വരാതിരിക്കാനുമായി ഫണ്ട് തട്ടിപ്പ് കേസ് അട്ടിമറിക്കുകയാണ്. കേസില്‍ പ്രതിയായ മുഴുവന്‍ ഉദ്യോഗസ്ഥന്മാരും ഇടത് യൂണിയന്‍ പ്രവര്‍ത്തകരാണ്. സംസ്ഥാന വ്യാപകമായി തദ്ദേശ സ്ഥാപനങ്ങള്‍ കേന്ദ്രീകരിച്ച് ഇത്തരം കൊള്ള നടക്കുന്നുണ്ട്. പട്ടിക ജാതി ക്ഷേമ ഫണ്ട് തട്ടിപ്പിന് നേതൃത്വം കൊടുത്ത ഡിവൈഎഫ്‌ഐ / സിപിഎം നേതാക്കള്‍ക്കെതിരെ കേസെടുക്കാന്‍ പോലീസ് തയ്യാറാകണമെന്നും അഡ്വ.പി സുധീര്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: