കൊല്ലം: കല്ലുവാതുക്കലില്‍ നവജാത ശിശുവിനെ കരിയിലക്കൂനയില്‍ മരിച്ച നിലയില്‍ കണ്ടെത്തിയ കേസില്‍ അറസ്റ്റിലായ അമ്മ രേഷ്മയോട് ചാറ്റ് ചെയ്തിരുന്നത് ആത്മഹത്യ ചെയ്ത യുവതികളെന്ന് പോലീസ്. രേഷ്മയുടെ ബന്ധുക്കള്‍ കൂടിയായ ആര്യയും ഗ്രീഷ്മയുമാണ് ഫേസ്ബുക്കില്‍ കാമുകനെന്ന വ്യാജേന അക്കൗണ്ട് ഉണ്ടാക്കി രേഷ്മയെ കബളിപ്പിച്ചത്.
അനന്തു എന്ന പേരില്‍ ഐഡി ഉണ്ടാക്കിയായിരുന്നു യുവതികള്‍ രേഷ്മയോട് ചാറ്റിങ്ങ് നടത്തിയിരുന്നത്. ഈ അക്കൗണ്ടില്‍ നിന്ന് രേഷ്മയ്‌ക്ക് കോളുകളൊന്നും വന്നിരുന്നില്ല. ഇതിനാല്‍ സംശയം തോന്നിയതുമില്ല. ചാറ്റിങ്ങിലൂടെ രേഷ്മയെ കബളിപ്പിക്കാനായിരുന്നു ഇരുവരുടേയും ശ്രമം. രേഷ്മ ഗര്‍ഭിണിയാണെന്ന് മനസിലാക്കിയ യുവതികള്‍ കുഞ്ഞിനെ ഉപേക്ഷിക്കാന്‍ നിര്‍ദ്ദേശിക്കുകയായിരുന്നു. രേഷ്മയെ കബളിപ്പിക്കുന്ന വിവരം ആത്മഹത്യ ചെയ്ത ഗ്രീഷ്മ മറ്റൊരു സുഹൃത്തിനോട് വെളിപ്പെടുത്തിയിരുന്നു. ഈ സുഹൃത്താണ് പോലീസിന് വിവരങ്ങള്‍ കൈമാറിയത്.
എന്നാല്‍ ഇയാളെക്കുറിച്ചുള്ള വിവരങ്ങള്‍ പോലീസ് ഇതുവരെ വെളിപ്പെടുത്തിയിട്ടില്ല. ഇയാളുടെ രഹസ്യമൊഴി പോലീസ് രേഖപ്പെടുത്തും. കുഞ്ഞിനെ കൊലപ്പെടുത്തിയ കേസില്‍ രേഷ്മ അറസ്റ്റിലായതിന് പിന്നാലെ ആര്യയെയും ഗ്രീഷ്മയെയും ചോദ്യം ചെയ്യാന്‍ പോലീസ് വിളിപ്പിച്ചിരുന്നു. ഇതിന് പിന്നാലെയാണ് ഇരുവരെയും ഇത്തിക്കരയാറ്റില്‍ മരിച്ച നിലയില്‍ കണ്ടെത്തിയത്. ചോദ്യം ചെയ്യലിന് ഹാജരാകാന്‍ പോലീസിന്റെ നിര്‍ദേശം ലഭിച്ചതിന് പിന്നാലെ ആര്യ ഭര്‍തൃ സഹോദരിയുടെ മകള്‍ ഗ്രീഷ്മയെയും കൂട്ടി ആത്മഹത്യ ചെയ്യുകയായിരുന്നു.
ചാറ്റിങ് നടത്തിയത് ഇരുവരും ചേര്‍ന്നായതിനാലാകാം യുവതികള്‍ ഒരുമിച്ച് ആത്മഹത്യ ചെയ്തതെന്നാണ് പോലീസ് കണ്ടെത്തല്‍. ഇക്കഴിഞ്ഞ ജനുവരിയിലാണ് കൊല്ലം പരവൂരിനടുത്ത് ഊഴായിക്കോട്ട് പുരയിടത്തില്‍ കരിയില കൂനയില്‍ ഉപേക്ഷിക്കപ്പെട്ട നിലയില്‍ നവജാതശിശുവിനെ കണ്ടെത്തിയത്.
ജന്മഭൂമി ഓണ്‍ലൈന്‍