കൊച്ചി: കരിപ്പൂര് സ്വര്ണക്കടത്തു കേസില് മുന് ഡിവൈഎഫ്ഐ നേതാവായ അര്ജുന് ആയങ്കിയെ കസ്റ്റംസ് സംഘംഅറസ്റ്റ് ചെയ്തു. ഒന്പത് മണിക്കൂര് നീണ്ട ചോദ്യം ചെയ്യലിന് ശേഷമാണ് അറസ്റ്റ് രേഖപ്പെടുത്തിയത്. കരിപ്പൂര് കേന്ദ്രീകരിച്ച് വന് സ്വര്ണക്കടത്ത് നടത്തുന്ന സംഘത്തിലെ പ്രധാനിയും സിപിഎം സൈബര് നേതാവുമാണ് അര്ജുന് ആയങ്കി.
ഇതിനിടെ കരിപ്പൂരില് നിന്നും അറസ്റ്റിലായ ഷെഫീഖിനെ കസ്റ്റഡിയില് വേണമെന്ന് ആവശ്യപ്പെട്ട് കസ്റ്റംസ് നല്കിയ അപേക്ഷ കോടതി അംഗീകരിച്ചിരുന്നു. ഇതോടെ ഇന്ന് ഷെഫീഖിനെയും കൊച്ചിയില് എത്തിക്കും. ഷെഫീഖിനെയും അര്ജുനെയും ഒന്നിച്ചിരുത്തി ചോദ്യം ചെയ്യാനാണ് നീക്കം. അര്ജുനെക്കുറിച്ചുള്ള വിവരങ്ങള് പോലീസിന് നല്കിയത് ഷെഫീഖ് ആണ്. ഏഴ് ദിവസമാണ് ഷെഫീഖിനെ കസ്റ്റഡിയില് വിട്ടിരിക്കുന്നത്.
സ്വര്ണവുമായി വിമാനത്താവളത്തിലെത്തിയ ഷഫീഖിനു നിര്ദേശങ്ങള് നല്കിയത് അര്ജുന് ആയിരുന്നുവെന്ന് കസ്റ്റംസ് റിപ്പോര്ട്ടില് പറയുന്നു. വിമാനത്താവളത്തില് എത്തുമ്പോള് എങ്ങനെ പെരുമാറണം എന്നതുള്പ്പടെയുള്ള നിര്ദേശങ്ങള് അര്ജുന് ഷഫീഖിനു നല്കി. സ്വര്ണക്കടത്തിനു പിന്നില് ദുബായ് കേന്ദ്രീകരിച്ചു പ്രവര്ത്തിക്കുന്ന മാഫിയയാണ്.
സ്വര്ണക്കടത്ത് കേസില് ഒളിവിലായിരുന്നു മുഖ്യപ്രതി അര്ജുന് ആയങ്കി ഇന്ന് രാവിലെയാണ് കസ്റ്റംസിനു മുന്നില് ഹാജരായത്. അര്ജുന് കൊച്ചി ഓഫിസിലെത്തിയത് രണ്ട് അഭിഭാഷകര്ക്കൊപ്പമാണ്. ഇന്നു ഹാജരായില്ലെങ്കിര് കര്ശന നടപടി സ്വീകരിക്കുമെന്ന് കസ്റ്റംസ് മുന്നറിയിപ്പ് നല്കിയിരുന്നു. കരിപ്പൂര് വിമാനത്തവാളത്തില് സ്വര്ണ്ണം കടത്തുന്നതിനിടയില് കസ്റ്റംസ് പിടികൂടിയ മുഹമ്മദ് ഷഫീഖിന് ക്വട്ടേഷന് സംഘനേതാവ് അര്ജുന് ആയങ്കിക്ക് ബന്ധമുണ്ടെന്ന് കസ്റ്റംസ് കണ്ടെത്തിയിരുന്നു. ഈ കേസില് നേരിട്ട് ജൂണ് 28ന് ഹാജരാകാന് ആവശ്യപ്പെട്ട് അര്ജുന് ആയങ്കിക്ക് കസ്റ്റംസ് നോട്ടീസയച്ചിരുന്നു. കസ്റ്റംസ് പ്രിവന്റീവ് വിഭാഗമാണ് നോട്ടീസ് അയച്ചത്. രാമാനാട്ടുകര അപകടത്തിന് ശേഷം ഒളിവില് പോയ അര്ജുനെ പൊലീസിന് ഇതുവരെയും പിടികൂടാന് കഴിഞ്ഞിരുന്നില്ല.
കേസിലെ പ്രതി മുഹമ്മദ് ഷഫീഖിന് അടുത്ത സ്വര്ണ്ണക്കടത്ത് കൂട്ടാളിയാണ് അര്ജുനെന്ന് സംശയമുണ്ട്. പത്ത് ദിവസത്തേക്ക് കസ്റ്റഡിയിലെടുത്ത് മുഹമ്മദ് ഷഫീഖിനെ ചോദ്യം ചെയ്യാനാണ് കസ്റ്റംസ് നീക്കം. ഇതിനിടെ അര്ജുന്റേതായി വാട്സാപ് ഗ്രൂപ്പുകളില് പ്രചരിക്കുന്ന ശബ്ദരേഖയും തെളിവായ് വന്നിരിക്കുകയാണ്. സ്വര്ണ്ണം കടത്തേണ്ട രീതിയും കൈമാറേണ്ടത് ആര്ക്കെന്ന വിവരവും അര്ജുന് ആയങ്കി ശബ്ദരേഖയില് വിവരിക്കുന്നുണ്ട്.
അര്ജുന് ആയങ്കി ഭീഷണിപ്പെടുത്തുന്ന ശബ്ദരേഖയും പുറത്തുവന്നിട്ടുണ്ട്. ഭീഷണിപ്പെടുത്തുന്ന മുഹമ്മദ് ഷഫീഖിനെയാണെന്നും സംശയിക്കുന്നു. കബളിപ്പിച്ചാല് ജീവിക്കാന് അനുവദിക്കില്ലെന്നും നാട്ടില് കാലുകുത്താന് സമ്മതിക്കില്ലെന്നും ഭീഷണിയിലുണ്ട്. മാഹിയിലേയും പാനൂരിലേയും പാര്ട്ടിക്കാര് തന്റെ പിന്നിലുണ്ടെന്നും അര്ജുന് ആയങ്കി അവകാശപ്പെടുന്നു. ഈ ഭീഷണിയിലൂടെ അര്ജുന്റെ സിപിഎമ്മുമായുള്ള ബന്ധം തന്നെയാണ് വീണ്ടും മറനീക്കി പുറത്ത് വരുന്നത്. അര്ജുന് ആയങ്കിയുമായി പാര്ട്ടിക്ക് ബന്ധമില്ലെന്ന് കഴിഞ്ഞ ദിവസം കണ്ണൂര് ജില്ലാസെക്രട്ടറി എം.വി. ജയരാജന് അവകാശപ്പെട്ടിരുന്നു. എന്നാല് ഇതിനെ പൊളിക്കുന്നതാണ് അര്ജുന് ആയങ്കിയുടെ ഫോണ് സംഭാഷണം. എന്നാല് ഈ ശബ്ദരേഖ അര്ജുന് ആയങ്കിയുടെ തന്നെയാണോ എന്ന് കസ്റ്റംസ് ഇതുവരെയും സ്ഥിരീകരിച്ചിട്ടില്ല.
സ്വര്ണക്കടത്തില് അര്ജുന് ആയങ്കിക്ക് നിര്ണായക പങ്കുണ്ടെന്നാണ് 2.33 കിലോ സ്വര്ണവുമായി വിമാനത്താവളത്തില് പിടിയിലായ ഷഫീഖിന്റെ വെളിപ്പെടുത്തിയത്. കാരിയറായി പ്രവര്ത്തിച്ച ഷഫീഖിനെ കസ്റ്റഡിയില് ആവശ്യപ്പെട്ട് കസ്റ്റംസ് സാമ്പത്തിക കുറ്റകൃത്യങ്ങള് പരിഗണിക്കുന്ന കോടതിക്കു നല്കിയ റിപ്പോര്ട്ടിലാണ് ഇതു സംബന്ധിച്ച വിവരങ്ങളുള്ളത്. ഇയാളെ കോടതി കസ്റ്റംസ് കസ്റ്റഡിയില് വിട്ടു.
