കൊല്ലം: കല്ലുവാതുക്കല് ഊഴായ്ക്കോട്ട് കരിയിലക്കൂട്ടത്തില് ഉപേക്ഷിച്ച നവജാതശിശു മരിച്ച സംഭവത്തില് മൊഴി രേഖപ്പെടുത്തുന്നതിന് പോലീസ് വിളിപ്പിച്ച യുവതികള് ആത്മഹത്യചെയ്തത് അന്വേഷണത്തിന് തിരിച്ചടിയായി. പ്രസവിച്ചയുടന് കുഞ്ഞിനെ കരിയിലക്കൂട്ടത്തില് ഉപേക്ഷിച്ച അമ്മ തന്നെ ആരുടെയോ കുഞ്ഞ് എന്ന് പറഞ്ഞു പരിചരിക്കുകയായിരുന്നു.
പ്രസവിച്ചു മണിക്കൂറുകള്ക്ക് ശേഷം ഒരു ഭാവവ്യത്യാസവുമില്ലാതെ രേഷ്മ എല്ലാവര്ക്കും മുന്നില് തന്റേടത്തോടെ അഭിനയിച്ചു. ജനുവരിയില് നടന്ന സംഭവങ്ങള് അതിശയിപ്പിക്കുന്നതെന്ന് ഭര്ത്താവ് വിഷ്ണുവും പറയുന്നു. ഫേസ്ബൂക്കിലൂടെ പരിചയപ്പെട്ട കാമുകനൊപ്പം പോകാന് കുഞ്ഞിനെ ഉപേക്ഷിച്ചെന്നായിരുന്നു അറസ്റ്റിലായ രേഷ്മ (22) യുടെ മൊഴി.
ഒന്പതുമാസത്തെ ഗര്ഭം വീട്ടുകാരെ അറിയിക്കാതെ ഒളിപ്പിച്ചതെങ്ങനെയെന്ന ചോദ്യം പോലീസിനെയും വലയ്ക്കുന്നു. ഈ വിവരങ്ങള് രേഷ്മയുടെ അടുത്തബന്ധുക്കളും സുഹൃത്തുക്കളുമായ ആര്യക്കും ഗ്രീഷ്മയ്ക്കും അറിയാമായിരുന്നോയെന്ന വിവരം തേടാനാണ് പോലീസ് വിളിപ്പിച്ചത്. യുവതികള് മരിച്ചതോടെ അജ്ഞാത കാമുകനെ കണ്ടെത്തുന്നതിനുള്ള വഴി അടഞ്ഞിരിക്കുകയാണ്.
