മൂവാറ്റുപുഴ: പട്ടിമറ്റം നെല്ലാട് ആര്യാ ഇന്റര്നാഷണല് ബാര് ഹോട്ടലില് സംഘം ചേര്ന്ന് ആക്രമണം നടത്തിയ കേസില് അഞ്ചുപേരെ കുന്നത്തുനാട് പോലീസ് പിടികൂടി. നെല്ലാട് സ്വദേശികളായ കാരിക്കാക്കുഴിയില് വീട്ടില് അനന്തു (24), പാര്പ്പനാല് വീട്ടില് അരുണ് (21), കൂറ്റന് പാറയില് വീട് ഡാനി (21), കാരിക്കാക്കുഴിയില് വീട് അജിത്ത് (24) എന്നിവരും വാളകം കുന്നക്കാല് മണിയിരിയില് വീട് സോനു (23) വുമാണ് കുന്നത്തുനാട് പോലീസിന്റെ പിടിയിലായത്.
ഏപ്രില് ആറിന് രാത്രി ബാറിലെത്തിയ സംഘം മദ്യം ആവശ്യപ്പെട്ടപ്പോള് നല്കാന് വിസമ്മതിച്ചതിനെ തുടര്ന്ന് ആക്രമണം നടത്തുകയായിരുന്നു. ബാര് ജീവനക്കാരെ മര്ദ്ദിച്ച വിവരം അറിഞ്ഞ് ബാറിലെത്തിയ മാനേജിങ് ഡയറക്ടര് പ്രദീപിനെ ഇവര് പട്ടികകൊണ്ട് അടിച്ച് തലക്കും കൈക്കും മാരകമായ പരിക്കേല്പ്പിക്കുകയും ചെയ്തു.
ഒളിവില് കഴിഞ്ഞ പ്രതികളെ ജില്ലാ പോലീസ് മേധാവി കെ. കാര്ത്തിക്കിന്റെ നേതൃത്വത്തില് രൂപീകരിച്ച അന്വേഷണ സംഘം പാലക്കാട്, നെല്ലാട് എന്നിവിടങ്ങളില് നിന്നാണ് പിടികൂടിയത്. പെരുമ്പാവൂര് ഡിവൈഎസ്പി എന്.ആര്ജയരാജ്, കുന്നത്തുനാട് ഇന്സ്പെക്ടര് സി. ബിനുകുമാര് എസ്ഐമാരായ ലെബിമോന്, എബി ജോര്ജ്ജ്, റ്റി.സി. ജോണി, എഎസ്ഐ എം.എ. സജീവന്, സീനിയര് സിവില് പോലീസ് ഓഫീസര്മാരായ പി.എ. അബ്ദുള്മനാഫ്, റ്റി.എ. അഫ്സല്, പി.എം. നിഷാദ്, ആര്.അജിത്ത്, കെ.എം. ഷിയാസ് എന്നിവരാണ് അന്വേഷണ സംഘത്തില് ഉണ്ടായിരുന്നത്.
