തിരുവനന്തപുരം : സംസ്ഥാനത്തെ ഏഴ് കോവിഡ് രോഗികളില് മ്യൂക്കോമൈകോസിസ് അഥവാ ബ്ലാക്ക് ഫംഗസ് കണ്ടെത്തി. തിരുവനന്തപുരം മെഡിക്കല് കോളേജില് ചികിത്സയില് കഴിയുന്നവിലാണ് ഫംഗസ് ഉള്ളതായി സ്ഥിരീകരിച്ചത്. ഇവരില് മൂന്ന് പേര് തമിഴ്നാട് സ്വദേശികളാണ്.
സംസ്ഥാനത്തെ ചികിത്സാ പ്രോട്ടോക്കോളിലും ഇത് ഉള്പ്പെടുത്തിയിട്ടുണ്ട്്. സംസ്ഥാനത്ത് ബ്ലാക്ക് ഫംഗസ് റിപ്പോര്ട്ട് ചെയ്തിട്ടുണ്ടെങ്കിലും നിലവില് ആശങ്കപ്പെടേണ്ട സാഹചര്യമില്ല. ആന്റി ഫംഗല് മരുന്നുകള് ഉപയോഗിച്ച് ബ്ലാക്ക് ഫംഗസ് ബാധ ചികിത്സിച്ച് ഭേദപ്പെടുത്താന് സാധിക്കുമെന്ന് ആരോഗ്യ വിദഗ്ധര് അറിയിച്ചു.
വായുവിലുള്ള മ്യൂക്കോമൈസെറ്റിസ് എന്ന ഫംഗസ് ആണ് രോഗബാധയുണ്ടാക്കുന്നത്. വായു, മണ്ണ്, ഭക്ഷണം എന്നിവയിലൊക്കെ ഈ ഫംഗസ് ഉണ്ടാകാം. എന്നാല് പൊതുവേ ഇത് മാരകമായ ഒന്നല്ല. കോവിഡ് ബാധിതര്, പ്രമേഹ രോഗികള്, രോഗപ്രതിരോധ ശേഷി കുറഞ്ഞവര് തുടങ്ങിയവരിലാണ് ഫംഗസ് ബാധയ്ക്ക് സാധ്യത കൂടുതലുണ്ട്.
കോവിഡ് ബാധിതരില് ബ്ലാക്ക് ഫംഗസ് വലിയതോതില് കാണപ്പെടുന്നതായി എയിംസ് മേധാവി ഡോ. രണ്ദീപ് ഗുലേറിയ കഴിഞ്ഞ ദിവസം അറിയിച്ചിരുന്നു. ദല്ഹി എയിംസില് മാത്രം 23 പേര്ക്ക് ഈ ഫംഗസ് ബാധ റിപ്പോര്ട്ട് ചെയ്യപ്പെട്ടിട്ടുണ്ട്. ചില സംസ്ഥാനങ്ങളില് ബ്ലാക് ഫംഗസ് ബാധിച്ച 400- 500 കേസുകളാണ് റിപ്പോര്ട്ട് ചെയ്തിട്ടുള്ളത്.
