വെര്‍ച്വല്‍ സത്യപ്രതിജ്ഞ തള്ളി മുഖ്യമന്ത്രി; പരമാവധി കുറച്ച് ആളുകളെന്ന് മുഖ്യമന്ത്രി; പൊതുജനങ്ങളെ പങ്കെടുപ്പിക്കുന്നില്ലെങ്കില്‍ ആരാണ് ഈ ആളുകള്‍?

തിരുവനന്തപുരം: വെര്‍ച്വല്‍ സത്യപ്രതിജ്ഞയെന്ന് ഇന്ത്യന്‍ മെഡിക്കല്‍ അസോസിയേഷന്റെ (ഐഎംഎ) ആവശ്യം തള്ളി മുഖ്യമന്ത്രി. പരമാവധി ചുരുക്കി വളരെ കുറച്ച് ആളുകൾ മാത്രമേ ചടങ്ങിൽ പങ്കെടുക്കൂ എന്നും വിശദാംശങ്ങൾ വഴിയേ അറിയിക്കുമെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു. മെയ് 20ന് തിരുവനന്തപുരത്തെ സെന്‍ട്രല്‍ സ്റ്റേഡിയത്തിലാണ് ചടങ്ങ്. 

പൊതുജനങ്ങള്‍ക്ക് പ്രവേശനമില്ലെന്ന് നേരത്തെ പ്രഖ്യാപിച്ചിരുന്നു. സാധാരണക്കാരന്‍ വോട്ട് ചെയ്ത് ജയിപ്പിച്ച ഈ കമ്മ്യൂണിസ്റ്റ് സര്‍ക്കാരിന്റെ സത്യപ്രതിജ്ഞാചടങ്ങില്‍ പിന്നെ ആരാണ് മുഖ്യമന്ത്രി ഉദ്ദേശിക്കുന്ന ആളുകള്‍? ഈ ചോദ്യം ഇപ്പോള്‍ സോഷ്യല്‍ മീഡിയയില്‍ വ്യാപകമായി ചര്‍ച്ചയാവുന്നു.  

“ഇടതുപക്ഷ ജനാധിപത്യ മുന്നണി മന്ത്രിസഭയുടെ സത്യപ്രതിജ്ഞക്ക് പൊതു ജനങ്ങൾക്ക് പ്രവേശനമുണ്ടാകില്ല. സാമൂഹ്യ-സാംസ്കാരിക രംഗങ്ങളിലെ പ്രമുഖരുണ്ടാവും എന്നും പറയുന്നു. ഒരു ജനാധിപത്യ സമൂഹത്തിൽ ജനപ്രതിനിധികളെ തെരഞ്ഞെടുക്കുന്ന പൊതുജനമില്ലെങ്കിൽ പിന്നെ ആരാണ് ഒരു സത്യപ്രതിജ്ഞാ ചടങ്ങിലെ പ്രമുഖർ? വോട്ടവകാശമുള്ള പൗരന് പ്രവേശനമില്ലാത്ത ഒരിടത്ത് അയാളേക്കാൾ/അവളെക്കാൾ വലിയ പ്രമുഖനാരാണ് എന്നത് ജനാധിപത്യത്തിലെ പ്രാഥമികമായ ചോദ്യമായി നാം ഉയർത്തണം.” സുപ്രീംകോടതി അഭിഭാഷകനായ പ്രമോദ് പുഴങ്കര ഫേസ്ബുക്കിൽ കുറിക്കുന്നു.  

“ഇന്നാട്ടിൽ ഇപ്പോൾ ആഘോഷങ്ങളും ഉത്സവങ്ങളും നമ്മൾ മാറ്റിവച്ചിരിക്കുകയാണ്. എല്ലാം ചടങ്ങിനുമാത്രം. വിവാഹത്തിന് 20 പേര് എന്ന് പറഞ്ഞാൽ എന്റെ വീട്ടിൽ ഒരു വിവാഹം നടന്നാൽ ഏറ്റവും അടുത്ത ബന്ധുക്കൾക്കുപോലും പങ്കെടുക്കാൻ പറ്റില്ല. 21 പേര് പങ്കെടുത്താൽ 21 പേരും കേസ് നേരിടേണ്ടിവരുന്ന നാടാണ് ഇതിപ്പോൾ. അപ്പോൾ ഇരുനൂറുപേരുടെയോ അഞ്ഞൂറ് പേരുടെയോ ചടങ്ങു നടത്തുന്നത്, എത്ര നിബന്ധനകളോടെ ആണെങ്കിലും ശരി, നാട്ടിൽ രണ്ടുതരം പൗരന്മാരുണ്ട് എന്ന അവസ്‌ഥ സൃഷ്ടിക്കലാണ്. നിയുക്തമന്ത്രിമാരുടെ ബന്ധുക്കൾ കാസർഗോഡുമുതൽ പല സ്‌ഥലത്തുനിന്നും തിരുവനന്തപുരം വരെ യാത്ര ചെയ്യും. അടിയന്തര ഘട്ടത്തിൽ അത് ചെയ്യേണ്ട എന്നല്ല; എന്നാൽ അങ്ങിനെയുള്ള ഒരു അടിയന്തിര സംഭവമല്ല സത്യപ്രതിജ്ഞ. അതൊരു ഭരണഘടനാ നടപടിയാണ്. അവർക്ക് മാത്രമായി നാട്ടിൽ വേറെ നിയമമില്ല.”- മാധ്യമപ്രവര്‍ത്തകന്‍ കെ.ജെ. ജേക്കബ് ഫേസ്ബുക്കില്‍ കുറിച്ചു. ഇത്തരം ആയിരക്കണക്കിന് അഭിപ്രായങ്ങളാണ്  കോവിഡ് അതിവ്യാപനത്തിനിടയില്‍ തിരുവനന്തപുരം സെന്‍ട്രല്‍ സ്റ്റേഡിയത്തില്‍ നടത്താന്‍ പോകുന്ന സത്യപ്രതിജ്ഞാ ചടങ്ങ് മാമാങ്കത്തിനെതിരെ ഉയരുന്നത്.  

ഇത്രയും പ്രതികൂല കാലാവസ്ഥയിലും ട്രിപ്പിള്‍ ലോക്ഡൗണിലേക്ക് കേരളത്തിലെ നാല് ജില്ലകള്‍ കുതിക്കുന്ന ഈ വേളയില്‍ ‘ഈ മനുഷ്യന് എന്ത് തരം കരുതലാണ് ഉള്ളതെ’ന്നാണ് മുഖ്യമന്ത്രിയെക്കുറിച്ച് ജനങ്ങള്‍ ചോദിച്ചുപോവുന്നത്.