ന്യൂദല്ഹി: കോവിഡ് വാക്സിനായ കോവിഷീല്ഡിന്റെ വില കുറച്ചു. സംസ്ഥാനങ്ങള്ക്ക് ഒരു ഡോസ് 300 രൂപയ്ക്ക് നല്കും. വാക്സിന് ഉത്പാദകരായ സിറം ഇന്സ്റ്റിറ്റ്യൂട്ട് ഓഫ് ഇന്ത്യയുടെ സിഇഒ അദാര് പൂനെവാലെയാണ് ഇത് സംബന്ധിച്ച് ട്വീറ്റ് ചെയ്തത്. നേരത്തേ 400 രൂപയായിരുന്നു ഒരു ഡോസ് വാക്സിന് സിറം പ്രഖ്യാപിച്ച വില. കോവിഷീല്ഡിന്റെയും കോവാക്സിന്റെയും വില കുറയ്ക്കണമെന്ന് സിറം ഇന്സ്റ്റിറ്റ്യൂട്ടിനോടും കോവാക്സിന്റെ നിര്മാതാക്കളായ ഭാരത് ബയോടെക്കിനോടും കേന്ദ്രസര്ക്കാര് നിര്ദേശിച്ചതായി കഴിഞ്ഞ ദിവസം റിപ്പോര്ട്ടുകളുണ്ടായിരുന്നു.
പിന്നാലെയാണ് സിറം ഇന്സ്റ്റിറ്റ്യൂട്ടിന്റെ തീരുമാനം എത്തുന്നത്. കോവാക്സിനും കോവിഷീല്ഡും ഡോസിന് 150 രൂപ നല്കിയാണ് കേന്ദ്രസര്ക്കാര് സംഭരിക്കുന്നത്. സംസ്ഥാനങ്ങള്ക്ക് 600 രൂപ നിരക്കില് കോവാക്സിന് നല്കുമെന്നായിരുന്നു ഭാരത് ബയോടെക് നേരത്തേ അറിയിച്ചിരുന്നത്. എന്നാല് സിറത്തിന്റെ തീരുമാനം എത്തിയതോടെ ഭാരത് ബയോടെക്കും വില കുറയ്ക്കുമെന്നാണ് പ്രതീക്ഷ. സ്വകാര്യ ആശുപത്രികള് കോവിഷീല്ഡിന് 600 രൂപ നല്കണം. കോവാക്സിന് 1,200 രൂപയും.
