തിരുവനന്തപുരം: നിയമസഭാ തെരഞ്ഞെടുപ്പിനിടെ വ്യാജരേഖകള് ചമച്ച് വ്യക്തിപരമായി അപകീര്ത്തിപ്പെടുത്തുകയും സ്ത്രീത്വത്തെ അവഹേളിക്കുന്ന നുണകള് പ്രചരിപ്പിക്കുകയും ചെയ്തവര്ക്കെതിരെ ദേശീയ വനിതാ കമ്മീഷന് പരാതി നല്കി കഴക്കൂട്ടം നിയോജക മണ്ഡലത്തില് എന്ഡിഎ സ്ഥാനാര്ത്ഥി ശോഭാ സുരേന്ദ്രന്. കോട്ടയം പാലാ സ്വദേശി അജിത് കുമാര്, ഓണ്ലൈന് മാധ്യമപ്രവര്ത്തകന് നന്ദകുമാര് എന്നിവര്ക്കെതിരേയാണ് ദേശീയ വനിതാ കമ്മീഷന് പരാതി നല്കിയതെന്ന് ശോഭാ സുരേന്ദ്രന് ഫേസ്ബുക്ക് പോസ്റ്റില് വ്യക്തമാക്കി.
ഫേസ്ബുക്ക് പോസ്റ്റിന്റെ പൂര്ണരൂപം:
നിയമസഭാ തെരഞ്ഞെടുപ്പില് കഴക്കൂട്ടം നിയോജക മണ്ഡലത്തില് എന്ഡിഎ സ്ഥാനാര്ത്ഥിയായി മല്സരിക്കുന്നതിനിടെ വ്യാജരേഖകള് ചമച്ച് വ്യക്തിപരമായി അപകീര്ത്തിപ്പെടുത്തുകയും സ്ത്രീത്വത്തെ അവഹേളിക്കുന്ന നുണകള് ഓണ്ലൈന് മാധ്യമങ്ങളിലൂടെ പ്രചരിപ്പിക്കുകയും ചെയ്ത കോട്ടയം പാലാ സ്വദേശി അജിത് കുമാര്, ഓണ്ലൈന് മാധ്യമപ്രവര്ത്തകന് നന്ദകുമാര് എന്നിവര്ക്കെതിരേ ദേശീയ വനിതാ കമ്മീഷന് പരാതി നല്കി. ഇരുവരും ചിലരുടെ നിക്ഷിപ്ത താല്പര്യങ്ങള്ക്കൊപ്പം ചേര്ന്ന് ഗൂഢാലോചന നടത്തിയതായി വ്യക്തമായ വിവരമുണ്ട്. അതിന്റെ തെളിവുകള് പരാതിക്കൊപ്പം സമര്പ്പിച്ചു. ക്രിമിനല് ഗൂഢാലോചനയ്ക്കും വ്യക്തിഹത്യയ്ക്കും വ്യാജ രേഖ ചമയ്ക്കലിനും എതിരേ കൂടുതല് നിയമ നടപടികള് സ്വീകരിക്കും. നീചമായ വിധത്തില് വ്യക്തിഹത്യ ചെയ്യുകയും സ്ത്രീ എന്ന നിലയിലുള്ള ആത്മാഭിമാനത്തിന് മുറിവേല്പ്പിക്കുകയും ചെയ്തതായി വനിതാ കമ്മീഷനെ അറിയിച്ചു. പൊതുപ്രവര്ത്തകരും അല്ലാത്തവരുമായ, ഇത്തരത്തില് ആക്രമണത്തിന് ഇരയാകേണ്ടി വരുന്ന മുഴുവന് സ്ത്രീകള്ക്കും വേണ്ടിയുള്ള ഇടപെടലും പോരാട്ടവുമാണിത്.
