കാസര്‍ഗോഡ്: മുഖ്യമന്ത്രി പിണറായി വിജയനെതിരെ രൂക്ഷ വിമര്‍ശനവുമായി ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. അസുരന്റ പണിയാണ് ശബരിമല വിഷയത്തില്‍ പിണറായി ചെയ്തതെന്ന് സുരേന്ദ്രന്‍ പറഞ്ഞു. സര്‍ക്കാരിന്റെ സംവിധാനം ഉപയോഗിച്ചാണ് അവിശ്വാസികളായ മനീതി സംഘത്തെ ഉള്‍പ്പെടെ ശബരിമലയിലേക്ക് അയച്ചത്. സര്‍ക്കാരിന്റെ ആബുലന്‍സില്‍ പൊലീസ് അകമ്പടിയിലാണ് അര്‍ദ്ധരാത്രി യുവതികളെ കയറ്റിയത്. അദ്ദേഹത്തിന്റെ നീചപ്രവൃത്തികള്‍ ജനം മറക്കില്ലെന്നും സുരേന്ദ്രന്‍ പറഞ്ഞു.
ഇനിയും ഹര്‍ത്താല്‍ നടത്തുന്നില്ലേയെന്ന് യുവതീ പ്രവേശനത്തിന് ശേഷം വിശ്വാസികളെ വെല്ലുവിളിച്ചയാളാണ് പിണറായി വിജയന്‍. തെരഞ്ഞെടുപ്പിന്റെ പടിവാതിലില്‍ മലക്കം മറഞ്ഞതുകൊണ്ടൊന്നും ഇടതുപക്ഷം രക്ഷപ്പെടില്ലെന്നും സുരേന്ദ്രന്‍ പറഞ്ഞു.
എന്‍എസ്എസ് ജനറല്‍ സെക്രട്ടറി പറഞ്ഞത് കൃത്യമായ സന്ദേശമാണ്. ആചാരങ്ങള്‍ സംരക്ഷിക്കാന്‍ നിലകൊണ്ടവരെ സഹായിക്കണമെന്ന് പറഞ്ഞത് ബിജെപി സ്വാഗതം ചെയ്യുന്നു. സാമൂഹ്യനീതി നടപ്പാക്കാന്‍ പാവപ്പെട്ടവരായ മുന്നോക്കക്കാര്‍ക്ക് സംവരണം ഏര്‍പ്പെടുത്തിയത് നരേന്ദ്രമോദി സര്‍ക്കാരായിരുന്നു. ഉയര്‍ന്ന പൊളിംഗ് എന്‍ഡിഎക്ക് ഗുണം ചെയ്യുമെന്നും സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക: