തിരുവനന്തപുരം: തിരൂരങ്ങാടിയിടെ പ്രവാസി വ്യവസായിയായ യൂസഫിനെ അപായപ്പെടുത്തുവാനുള്ള ക്വട്ടേഷനുമായെത്തിയ സംഘത്തിലെ പ്രധാനിയുടെ കൂട്ടാളിയായ സജു അമർ ദാസ് യൂത്ത് കോൺഗ്രസ് വട്ടിയൂർക്കാവ് മണ്ഡലം ജനറൽ സെക്രട്ടറി. തെരഞ്ഞെടുപ്പിന്റെ ഈ ഘട്ടത്തിൽ തിരക്കിട്ട് നടത്തിയ ഈ പ്രഖ്യാപനത്തിൽ കോൺഗ്രസുകാർക്കിടയിൽ അമർഷം പുകയുകയാണ്.
സജുവിന് ക്വട്ടേഷൻ സംഘങ്ങളുമായി ബന്ധമുണ്ടെന്നാണ് ഈ നിയമനത്തെ എതിർക്കുന്നവരുടെ വാദം. തിരുവനന്തപുരം നഗരത്തിൽ ഇയാൾക്ക് ക്വട്ടേഷൻ സംഘം ഉണ്ടെന്നും പറയപ്പെടുന്നു. വ്യവസായിയെ അപായപ്പെടുത്താൻ പോയ ക്വട്ടേഷൻ സംഘം സഞ്ചരിച്ച വാഹനം പരിശോധനയ്ക്കിടെ സംശയം തോന്നി തടഞ്ഞുവച്ച തേഞ്ഞിപ്പലം എസ്.ഐ അഭിലാഷിനെ തട്ടിക്കൊണ്ടുപോകാൻ ശ്രമിച്ച സംഘത്തിലെ അംഗമാണ് സജു അമർ ഭാസ്. തുടർന്ന് സജുവിനെയും സംഘത്തെയും പോലീസ് അറസ്റ്റ് ചെയ്തിരുന്നു.
ഇയാൾ മുൻ ഡിവൈഎഫ്ഐ പ്രവർത്തകനായിരുന്നു. ഇപ്പോൾ കുറച്ചു കാലമായി കോൺഗ്രസിന്റെ കൂടെയാണ്. വട്ടിയൂർക്കാവിലെ യുഡിഎഫ് സ്ഥാനാർത്ഥിയുടെ കൂടെ സജീവമായി തന്നെ ഇയാൾ പ്രവർത്തന രംഗത്ത് ഉണ്ട്. കൂടാതെ പ്രിയങ്ക ഗാന്ധി ആറ്റുകാൽ ക്ഷേത്രത്തിൽ ദർശനത്തിനെത്തിയപ്പോഴും ഇയാൾ തൊട്ടടുത്തു തന്നെ ഉണ്ടായിരുന്നു. നേമത്തെ യുഡിഎഫ് സ്ഥാനാർത്ഥി കെ.മുരളീധരനുമായും ഇയാൾ നല്ല ബന്ധത്തിലാണ്.
ക്വട്ടേഷൻ സംഘാംഗത്തെ യൂത്ത് കോൺഗ്രസ് ഭാരവാഹിയാക്കിയതിൽ പ്രതിഷേധിച്ച് വട്ടിയൂർക്കാവിലെയും നേമത്തെയും യൂത്ത് കോൺഗ്രസ് പ്രവർത്തകർ നേതൃത്യത്തിന് പരാതി നൽകാൻ ഒരുങ്ങുകയാണ്.
