മുംബൈ: മുകേഷ് അംബാനിയുടെ ആഡംബര വസതിയായ ആന്റിലിയയ്ക്ക് മുന്നില് സ്ഫോടകവസ്തുക്കള് നിറച്ച വാഹനം ഉപേക്ഷിച്ച നിലയില് കണ്ടെത്തിയ സംഭവത്തില് പ്രതിയായ സച്ചിന് വാസെയെന്ന ക്രൈംബ്രാഞ്ച് പൊലീസുദ്യോഗസ്ഥന് മിഥി നദിയിലേക്ക് വലിച്ചെറിഞ്ഞ തെളിവുകളായ ലാപ്ടോപും ഡിവിആറും നമ്പര് പ്ലേറ്റുകളും എന്ഐഎ കണ്ടെടുത്തു. ഇതോടെ കേസില് സച്ചിന് വാസെയുടെ പങ്ക് കൂടുതല് തെളിഞ്ഞു.
രണ്ട് സിപിയുകള്, ലാപ് ടോപ്, രണ്ട് കാര് നമ്പര് പ്ലേറ്റുകള്, ഒരു റൗട്ടറും പ്രിന്ററും എന്നിവ കണ്ടെടുത്ത വസ്തുക്കളില് പെടുന്നു. സച്ചിന് വാസെയും കൂട്ടാളികളും കൂടി കുറ്റകൃത്യത്തിന് ഉപയോഗിച്ച വസ്തുക്കളാണിവ. ഈ തെളിവുകളുടെ വസ്തുത സ്ഥിരീകരിക്കാന് സച്ചിന് വാസെയെ തെളിവെടുപ്പിനായി കൊണ്ടുവന്നു. സച്ചിന് വാസെയുടെ വലംകൈയായി പ്രവര്ത്തിച്ച റിയാസ് ഖാസിയെയും തെളിവെടുപ്പിനായി കൊണ്ടുവന്നു. ഇപ്പോള് കേസില് മാപ്പ് സാക്ഷിയാണ് റിയാസ് ഖാസി. ഞായറാഴ്ച എന്ഐഎ ടീമിലുള്ള സൂപ്രണ്ട് വിക്രം ഖലാട്ടെയുടെ നേതൃത്വത്തിലുള്ള സംഘം ബാന്ദ്ര കുര്ള കോംപ്ലക്സിനും ബാലി ബസാറിനും അടുത്തുള്ള മിഥി നദിയ്ക്ക് കുറുകെയുള്ള പാലത്തില് എത്തി. അവിടെ മുങ്ങല്ത്തപ്പല് വിദഗ്ധര് നടത്തിയ മൂന്ന് മണിക്കൂര് നീണ്ട പരിശോധനയ്ക്കൊടുവിലാണ് തെളിവുകള് കണ്ടെത്തിയത്.
തെളിവുകള് നശിപ്പിക്കാന് പ്രതികള് തെരഞ്ഞെടുത്ത കേന്ദ്രത്തെക്കുറിച്ച് എന്ഐഎയ്ക്ക് വ്യക്തമായ വിവരം ലഭിച്ചിട്ടുണ്ട്. അതിന്റെ അടിസ്ഥാനത്തിലായിരുന്നു തിരച്ചില്.
മുംബൈ പൊലീസും കൂടി ഉള്പ്പെട്ടതായി കണ്ടെത്തിയതോടെ ഭരണത്തിലുള്ള ശിവസേനയും എന്സിപിയും കോണ്ഗ്രസും മുഖം നഷ്ടപ്പെട്ട നിലയിലായി. ഇപ്പോള് മുംബൈ പൊലീസ് കമ്മീഷണര് പരം ബീര് സിംഗിനെ മാറ്റി മുഖം രക്ഷിയ്ക്കാന് ശ്രമിച്ചെങ്കിലും സര്ക്കാരിനെതിരെ കൂടുതല് ഗുരുതരമായ ആരോപണവുമായി എത്തുകയായിരുന്നു പരംബീര് സിംഗ്. ആഭ്യന്തരമന്ത്രി അനില് ദേശ്മുഖ് മാസം തോറും ആയിരം കോടി വീതം ഡാന്സ് ബാറുകളില് നിന്നും അനധികൃതമായി പിരിച്ചെടുക്കാന് ആവശ്യപ്പെട്ടെന്നും ഇതേക്കുറിച്ച് വിശദമായി അന്വേഷിക്കണമെന്നും ആവശ്യപ്പെട്ടിരിക്കുകയാണ് പരംബീര് സിംഗ്. ഇക്കാര്യത്തില് സിബിഐ അന്വേഷണം ആവശ്യപ്പെട്ട് സുപ്രീംകോടതിയെ സമീപിച്ചെങ്കിലും ഹൈക്കോടതിയെ സമീപിക്കാന് നിര്ദേശിക്കുകയായിരുന്നു. അടുത്ത ദിവസം ഹൈക്കോടതി കേസ് പരിഗണിക്കും.
ഇതിനിടെ എന്സിപി നേതാവ് ശരത്പവാര് കേന്ദ്ര ആഭ്യന്തരമന്ത്രി അമിത് ഷായെ കണ്ടതായി സ്ഥിരീകരിക്കാത്ത വാര്ത്തകളുണ്ട്.
മുന് മുഖ്യമന്ത്രിയും ബിജെപി നേതാവുമായ ഫഡ്നാവിസിന്റെ നേതൃത്വത്തില് മഹാരാഷ്ട്ര സര്ക്കാരിനെതിരെ ശക്തമായ വിമര്ശനങ്ങള് ഉയരുകയാണ്. ഇതോടെ കേസിന് രാഷ്ട്രീയനിറം കൈവന്നിരിക്കുകയാണ്. ആന്റില ബോംബ് കേസ് മുംബൈ പൊലീസും ആന്റി ടെററിസം സ്ക്വാഡും (എടിഎസ്) അന്വേഷിച്ചു വരികയായിരുന്നു. എന്നാല് ബോംബ് നിറച്ച വാഹനത്തിന്റെ ഉടമയും കൊല്ലപ്പെടുകയും ചെയ്ത മന്സുഖ് ഹിരന്റെ ഭാര്യ സച്ചിന് വാസെയാണ് തന്റെ ഭര്ത്താവിന്റെ മരണത്തിന് കാരണമെന്ന ആരോപണം ഉയര്ത്തിയതോടെയാണ് സച്ചിന് വാസെ കേസില് എത്തുന്നത്. ആരോപണത്തിന് ശക്തികൂട്ടുന്ന ചില തെളിവുകള് ബിജെപി നേതാവ് ഫഡ്നാവിസ് നിരത്തുകയും ചെയ്തു. പ്രധാനമായും സച്ചിന് വാസെയും മന്സുഖ് ഹിരനും തമ്മില് നടന്ന ഫോണ് സംഭാഷണങ്ങളാണ് ഫഡ്നാവിസ് പുറത്ത് വിട്ടത്. ഇതോടെ കേസന്വേഷണം സംസ്ഥാന പൊലീസിന്റെ കൈകളില് നിന്നും നഷ്ടപ്പെടുകയും അത് എന്ഐഎയുടെ കൈകളില് വന്നുചേരുകയും ചെയ്തു. തൊട്ടടുത്ത ദിവസം മന്സുഖ് ഹിരന്റേത് ആത്മഹത്യയല്ല, കൊലപാതകമാണെന്ന് കണ്ടെത്തുകയും സച്ചിന് വാസെയെ അറസ്റ്റ് ചെയ്യുകയും ചെയ്തു.
ഇപ്പോള് ബിജെപി മുഖ്യമന്ത്രി ഉദ്ദവ് താക്കറെയുടെ രാജി തന്നെ ആവശ്യപ്പെടുകയാണ്. കാരണം ശിവസേനക്കാരനായ സച്ചിന് വാസെയെ രക്ഷിക്കാന് മുഖ്യമന്ത്രി ശ്രമിച്ചെന്നാണ് ബിജെപി ആരോപണം. കേസ് കൈകാര്യം ചെയ്ത രീതിയെ മഹാവികാസ് അഘാദിയിലെ ഘടകകക്ഷികളായ കോണ്ഗ്രസും എന്സിപിയും മുഖ്യമന്ത്രിയെയും ശിവസേനയെയും പ്രതിക്കൂട്ടില് നിര്ത്തുകയാണ്. സച്ചിന് വാസെയെ മുഖ്യമന്ത്രിയും ശിവസേനുയം കൂടി രക്ഷിയ്ക്കുകയാണെന്ന ബിജെപി ആരോപണം ശക്തമായപ്പോഴാണ് അദ്ദേഹത്തെ സസ്പെന്റ് ചെയ്യാന് ഉദ്ദവ് താക്കറെ തയ്യാറായത്.
