കരമന: നേമത്ത് ബിജെപിയുടെ വിജയതുടര്ച്ച ഉറപ്പാണെന്ന് ദേശീയ അധ്യക്ഷന് ജെ പി നദ്ദ. പാര്ട്ടിയുടെ ഏറ്റവും കരുത്തനായ ആളെയാണ് സ്ഥാനാര്ത്ഥിയാക്കിയിരിക്കുന്നത്. നിലവിലെ എംഎല്എ ഒ രാജഗോപാല് നടത്തിയ വികസനപ്രവര്ത്തനങ്ങള് മുന്നോട്ടു കൊണ്ടുപോകാന് കുമ്മനത്തിന് കഴിയും. മണ്ഡലത്തില് നടന്ന റോഡ് ഷോയില് സംസാരിക്കുകയായിരുന്നു നദ്ദ.
ഇരുമുന്നണികളും ഭായ- ഭായി മാരാണ്. കേരളത്തിലെ പരസ്പര മത്സരം ആളുകളെ പറ്റിക്കാനാണ്. വിവരമുള്ള ജനം അതു തിരിച്ചറിയും.
ശബരിമല വിഷയത്തില് സംസ്ഥാന സര്ക്കാര് വിശ്വാസികള്ക്ക് എതിരായിരുന്നു. ബിജെപി അധികാരത്തിലെത്തിയാല് വിശ്വാസ സംരക്ഷണത്തിനായി നിലകൊള്ളും. നദ്ദ പറഞ്ഞു.
നേമത്തു നിന്ന് കരമനയിലേക്കായിരുന്നു റോഡ് ഷോ. ആവേശം അലതല്ലിയ അന്തരീക്ഷത്തില് ആയിരത്തിലധികം ഇരുചക്രവാഹനങ്ങളില് പ്രവര്ത്തകര് . തുറന്ന വാഹനത്തില് ദേശീയ അധ്യക്ഷനും എം എല് എ ഒ രാജഗോപാലും സ്ഥാനാര്ത്ഥി കുമ്മനം രാജശേഖരനും.
കരമന കല്പ്പാളയത്തെത്തിയപ്പോള് വാഹന റാലി പദയാത്രയായി. മുത്താരിയമ്മന് ക്ഷേത്രസമീപത്താണ് യാത്ര സമാപിച്ചത്.
