കൊച്ചി : ബിജെപി സ്ഥാനാര്‍ത്ഥികളായ എന്‍. ഹരിദാസ്, നിവേദിത സുബ്രഹ്‌മണ്യം എന്നിവരുടെ ഹര്‍ജി തള്ളിയതുമായി ബന്ധപ്പെട്ട കേസ് പരിഗണിക്കുന്നത് നാളത്തേയ്ക്ക് മാറ്റി. തിങ്കളാഴ്ച 12ന് ഹൈക്കോടതി വാദം കേള്‍ക്കും. ജസ്റ്റിസ് എന്‍. നഗരേഷാണ് കേസ് പരിഗണിച്ചത്.
ഇതുമായി ബന്ധപ്പെട്ട് തിങ്കളാഴ്‌ച്ച എതിര്‍ സത്യവാങ്മൂലം നല്‍കാനും ഹൈക്കോടതി തെരഞ്ഞെടുപ്പ് കമ്മീഷനോട് ആവശ്യപ്പെട്ടിട്ടുണ്ട്. ചിഹ്നം അനുവദിക്കാന്‍ സംസ്ഥാന പ്രസിഡന്റിനെ ചുമതലപ്പെടുത്തി നല്‍കുന്ന ഫോം എയില്‍ ദേശീയ പ്രസിഡന്റിന്റെ ഒപ്പില്ല എന്ന കാരണത്താലാണ് തലശ്ശേരിയിലെ എന്‍ഡിഎ സ്ഥാനാര്‍ത്ഥി ഹരിദാസിന്റെ നാമനിര്‍ദ്ദേശ പത്രിക തള്ളിയത്. ബിജെപി സംസ്ഥാന പ്രസിഡന്റിന്റെ ഒപ്പ് പത്രികയില്‍ ഇല്ലെന്ന് ചൂണ്ടിക്കാട്ടിയാണ് നിവേദിത സുബ്രഹ്‌മണ്യത്തിന്റേയും പത്രിക തള്ളിയത്.
തലശ്ശേരിയിലെ കോണ്‍ഗ്രസ് സ്ഥാനാനാര്‍ത്ഥി പി.വി. അരവിന്ദാക്ഷന്‍ കേസില്‍ കക്ഷി ചേരാന്‍ അപേക്ഷ നല്‍കി. അതേസമയം നാമനിര്‍ദ്ദേശ പത്രിക തള്ളിയ സംഭവത്തില്‍ കോടതിക്ക് ഇടപെടാനാവില്ലെന്ന് തെരഞ്ഞെടുപ്പ് കമ്മീഷന്‍ ഹൈക്കോടതിയില്‍ അറിയിച്ചു. ഫലപ്രഖ്യാപനത്തിന് ശേഷം തെരഞ്ഞെടുപ്പ് ഹര്‍ജിയിലൂടെ മാത്രമേ തെരഞ്ഞെടുപ്പില്‍ ഇടപെടാനാകൂ. വിജ്ഞാപനം വന്ന ശേഷം കോടതി ഇടപെടുന്നതില്‍ തടസമുണ്ടെന്നാണ് തെരഞ്ഞെടുപ്പ് കമ്മീഷന്റെ വാദം. വിജ്ഞാപനം വന്ന ശേഷമുള്ള കോടതി ഇടപെടല്‍ സ്വതന്ത്രവും നീതിപൂര്‍വവുമായ തെരഞ്ഞെടുപ്പിനെ തടസ്സപ്പെടുത്തുമെന്നും കമ്മീഷന്‍ കോടതിയില്‍ അറിയിച്ചു.
പ്രതികരിക്കാൻ ഇവിടെ എഴുതുക: