മുംബൈ: മഹാരാഷ്ട്ര ആഭ്യന്തരമന്ത്രി അനില് ദേശ്മുഖ് എല്ലാമാസവും 100 കോടി വീതം പിരിച്ചു നല്കാന് പോലീസിനോട് ആവശ്യപ്പെട്ടതായി വെളിപ്പെടുത്തല്. മുകേഷ് അംബാനിയുടെ വീടിന് സമീപത്തായി ബോംബ് കണ്ടെത്തിയ കേസുമായി ബന്ധപ്പെട്ട് പുറത്താക്കിയ മുംബൈ പോലീസ് തലവന് പരംബീര് സിങ്ങാണ് ആഭ്യന്തര മന്ത്രി അനില് ദേശ്മുഖിനെതിരെ വന് അഴിമതിയാരോപണം ഉന്നയിച്ചത്.
സംസ്ഥാനത്തെ പോലീസ് നടപടികളില് മന്ത്രി അന്യായമായി മന്ത്രി ഇടപെടലുകള് നടത്തിയിരുന്നു. മന്ത്രി എല്ലാ മാസവും 100 കോടി രൂപ പിരിച്ചു നല്കാനും ആവശ്യപ്പെട്ടന്നായിരുന്നു പരംബീറിന്റെ വെളിപ്പെടുത്തല്. മുഖ്യമന്ത്രി ഉദ്ധവ് താക്കറെക്ക് നല്കിയ കത്തിലാണ് ആഭ്യന്തരമന്ത്രിക്കെതിരെ മുന് പൊലീസ് ഉദ്യോഗസ്ഥന് ഗുരുതരമായ ആരോപണം ഉന്നയിച്ചത്. അംബാനി കേസില് പുറത്താക്കിയ സച്ചിന് വാസെ എന്ന ഉദ്യോഗസ്ഥനെയടക്കം മന്ത്രി ഇടപെട്ടാണ് നിയമിച്ചതെന്നും പരംബീര് സിങ് ആരോപിച്ചു. ഇക്കാര്യങ്ങള് എന്സിപി നേതാവ് ശരദ് പവാറിനെയും അറിയിച്ചിരുന്നെന്നും അദ്ദേഹം വ്യക്തമാക്കി.
അതേസമയം മന്ത്രി ഈ ആരോപണം നിഷേധിച്ചു. പരംബീര് സിങ്ങിനെതിരെ മാനനഷ്ടക്കേസ് ഫയല് ചെയ്യുമെന്നും അദ്ദേഹം പ്രതികരിച്ചു. മുകേഷ് അംബാനിയുടെ വീടിന് സമീപം ബോംബ് കണ്ടെത്തിയ കേസില് ഗുരുതരമായ വീഴ്ച വരുത്തിയതില് നിന്ന് രക്ഷപ്പെടാനാണ് പരംബീര് സിങ് തനിക്കെതിരെ ഇല്ലാത്ത ആരോപണങ്ങള് ഉന്നയിക്കുന്നതെന്ന് അനില് ദേശ്മുഖ് വിശദീകരിച്ചു.
ആഭ്യന്തര മന്ത്രിക്കെതിരെ ഗുരുതരമായ വെളിപ്പെടുത്തലുകളാണ് പുറത്തുവന്നിരിക്കുവന്നത്. ഇതില് അദ്ദേഹം രാജിവെച്ച് അന്വേഷണത്തെ നേരിടണമെന്നും പ്രതിപക്ഷമായ ബിജെപി ആവശ്യപ്പെട്ടു. അംബാനി കേസില് സച്ചിന് വസെയെ എന്ഐഎ അറസ്റ്റ് ചെയ്തിരുന്നു. കേസിന് പിന്നില് മുംബൈ പോലീസാണെന്ന് ആരോപണമുയരുകയും ഇതോടെ മുംബൈ പോലീസ് മേധാവിയായിരുന്ന പരംബീര് സിങ്ങിനെ സ്ഥാനത്തു നിന്നും നീക്കുകയുമായിരുന്നു.
