വാഷിങ്ടണ്‍: വിമാനത്തിൽ കയറുന്നതിനിടെ കാലിടറി വീണ് അമേരിക്കന്‍ പ്രസിഡന്റ് ജോ ബൈഡന്‍. ഒരു തവണയല്ല, മൂന്ന് തവണയാണ് ബാലന്‍സ് കിട്ടാതെ ബൈഡന്‍ വിഷമിച്ചത്. എയര്‍ ഫോഴ്സ് വണ്‍ വിമാനത്തിലേയ്‌ക്കുള്ള പടികള്‍ കയറുന്നതിനിടെയാണ് അദ്ദേഹത്തിന് കാലിടറിയത്.
ബൈഡൻ കാലിടറി വീഴുന്ന വീഡിയോ സമൂഹ മാദ്ധ്യമങ്ങളിൽ ചര്‍ച്ചാ വിഷയമായി. അറ്റ്ലാന്റയിലേയ്‌ക്ക് പോകാനായി വിമാനത്തില്‍ കയറുന്നതിനിടെയാണ് 78കാരനായ അമേരിക്കന്‍ പ്രസിഡന്റ് കാലിടറി വീണത്. വശങ്ങളിലുള്ള കൈവരിയില്‍ പിടിച്ചാണ് കയറിയതെങ്കിലും ഏകദേശം മധ്യഭാഗത്ത് എത്തിയപ്പോള്‍ അദ്ദേഹത്തിന് ബാലന്‍സ് നഷ്ടപ്പെടുകയായിരുന്നു. തുടര്‍ച്ചയായി മൂന്ന് തവണ വീണുപോയെങ്കിലും പൂര്‍വ്വാധികം ശക്തിയോടെ അദ്ദേഹം അവശേഷിച്ച പടവുകള്‍ ഓടിക്കയറുന്നതും വീഡിയോയില്‍ ഉണ്ട്.
കാലിടറി വീണെങ്കിലും പ്രസിഡന്റ് സുഖമായിരിക്കുന്നു എന്ന് വൈറ്റ് ഹൗസ് പ്രസ് സെക്രട്ടറി കരീന ജീന പിയേറെ അറിയിച്ചു. വലിയ രീതിയില്‍ കാറ്റ് വീശിയിരുന്നു എന്നും തനിക്കും ഇടയ്‌ക്ക് ബാലന്‍സ് നഷ്ടമായതു പോലെ തോന്നിയിരുന്നു എന്നും പറഞ്ഞ കരീന പ്രസിഡന്റ് 100 ശതമാനം ആരോഗ്യവാനാണെന്നും കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: