പുനലൂര്‍ : തമിഴ്‌നാട്ടില്‍നിന്ന് പിക്അപ്പില്‍ മൂന്നര കിലോ കഞ്ചാവ് കടത്തിവന്ന സംഘം പിടിയില്‍. പുനലൂര്‍ മുസാവരി കുന്ന് ചരുവിള പുത്തന്‍ വിട്ടീല്‍ ഷാനവാസ് (34), കല്ലുമല സമദ് മന്‍സില്‍ അബ്ദുല്‍ ഫഹദ് (25), പേപ്പര്‍മില്ലിന് സമീപം ചരുവിള പുത്തന്‍വീട്ടില്‍ അലന്‍ജോര്‍ജ് (27) എന്നിവരെയാണ് ആര്യങ്കാവില്‍ പോലീസ്എക്‌സൈസ് സംഘം അറസ്റ്റ് ചെയ്തത്.
ഉപയോഗശൂന്യമായ തെര്‍മോക്കോളടക്കം അവശിഷ്ടങ്ങള്‍ തുണിയില്‍ പൊതിഞ്ഞ് പിക്അപ്പിന്റെ പിറകിലുണ്ടായിരുന്നു. ബോണറ്റിനുള്ളിലാണ് പ്രത്യേക സഞ്ചിയിലാക്കി കഞ്ചാവ് ഒളിപ്പിച്ചിരുന്നത്. ദിണ്ഡിക്കല്‍ നിന്നുമാണ് എത്തിച്ചത്. ലോഡ് കയറ്റാതെ എത്തിയാൽ ചെക്ക് പോസ്റ്റിലെ വാഹനപരിശോധനയിൽ നിന്ന് ഒഴിവാകാമെന്ന ധാരണയിലാണ് മൂന്നുപേരും കഞ്ചാവുമായി ആര്യങ്കാവ് വഴി എത്തിയത്.
പുനലൂര്‍, കൊല്ലം മേഖലകളിലെ വിദ്യാര്‍ഥികള്‍ക്ക് വിതരണം ചെയ്യാനാണ് കഞ്ചാവ് എത്തിച്ചതെന്ന് പിടിയിലായവര്‍ പറഞ്ഞതായി അധികൃതര്‍ പറഞ്ഞു. പുനലൂർ, പത്തനാപുരം താലൂക്കുകളിൽ ചെറുകിട വ്യാപാരശാലകളിൽ വിൽപ്പനയ്‌ക്കായി കഞ്ചാവ് എത്തിച്ചു നൽകുന്നതും ഇവരാണെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: