ഹോക്കി: ബ്രിട്ടനെ തകര്‍ത്ത് ഇന്ത്യ

ആന്റ്‌വെര്‍പ്: യൂറോപ്യന്‍ പര്യടനത്തിലെ അവസാന മത്സരത്തില്‍ ഇന്ത്യന്‍ ഹോക്കി ടീമിന് തകര്‍പ്പന്‍ ജയം. കരുത്തരായ ബ്രിട്ടനെ രണ്ടിനെതിരെ മൂന്ന് ഗോളുകള്‍ക്കാണ് ടീം ഇന്ത്യ തകര്‍ത്തത്. ഇതോടെ ഒറ്റ കളി പോലും തോല്‍ക്കാതെ ഇന്ത്യ പര്യടനം പൂര്‍ത്തിയാക്കി.

അവസാന മത്സരത്തില്‍ ഇന്ത്യക്കായി മന്‍ദീപ് സിങ് രണ്ട് ഗോളും ഹര്‍മന്‍പ്രീത് സിങ് ഒരു ഗോളും നേടി.ബ്രിട്ടനുവേണ്ടി ജെയിംസും ആദവും സ്‌കോര്‍ ചെയ്തു.  

ബ്രിട്ടനെതിരായ ഇതിനുമുന്‍പുള്ള മത്സരത്തില്‍ ഇന്ത്യ 1-1 എന്ന സ്‌കോറിന് സമനില നേടിയിരുന്നു. നേരത്തെ ജര്‍മനിയുമായും ഇന്ത്യ രണ്ട് മത്സരങ്ങള്‍ കളിച്ചിരുന്നു. ആദ്യ മത്സരത്തില്‍ ഇന്ത്യ 1-1 എന്ന സ്‌കോറിന് സമനില വഴങ്ങിയപ്പോള്‍ രണ്ടാം മത്സരത്തില്‍ ജര്‍മനിയെ 6-1 എന്ന സ്‌കോറിന് തകര്‍ത്തു. മലയാളി താരവും ഗോള്‍കീപ്പറുമായ പി.ആര്‍. ശ്രീജേഷാണ് ഇന്ത്യയെ നയിച്ചത്. സ്ട്രൈക്കര്‍മാരുടെ മിന്നും ഫോമും ശ്രീജേഷിന്റെ തകര്‍പ്പന്‍ സേവുകളും ഇന്ത്യയുടെ വിജയത്തില്‍ നിര്‍ണായക ഘടകങ്ങളായി.