ന്യൂദല്ഹി: കൊച്ചിയില് നടിയെ ആക്രമിച്ച കേസിലെ വിചാരണ പൂര്ത്തിയാക്കാന് ആറു മാസത്തെ സമയം കൂടി സുപ്രീം കോടതി അനുവദിച്ചു. വിചാരണ കോടതി ജഡ്ജിയുടെ ആവശ്യം പരിഗണിച്ചാണ് കോടതി നടപടി. പ്രത്യേക വിചാരണ കോടതി ജഡ്ജി ഹണി എം വര്ഗീസ് നല്കിയ ഹര്ജി ജസ്റ്റിസ് എ എം ഖാന്വില്ക്കര് അധ്യക്ഷനായ ബെഞ്ചാണ് പരിഗണിച്ചത്. ഇപ്പോഴത്തേത് അവസാനത്തെ നീട്ടലാണെന്നും ഇതില് കൂടുതല് സമയം നല്കില്ലെന്നും കോടതി വ്യക്തമാക്കി.
വിചാരണ പൂര്ത്തിയാക്കാന് ആറ് മാസത്തെ സമയം കൂടി നല്കണമെന്നാവശ്യപ്പെട്ട് വിചാരണ കോടതി ജഡ്ജി കഴിഞ്ഞദിവസം സുപ്രീം കോടതിയില് കത്ത് നല്കിയിരുന്നു. പ്രോസിക്യൂഷന്റെ ട്രാന്സ്ഫര് പെറ്റിഷനുകളും, പ്രോസിക്യുട്ടര് ഹാജരാവാത്തതിനാലുമാണ് നിര്ദേശിച്ച സമയത്തിന് ഉള്ളില് വിചാരണ പൂര്ത്തിയാക്കാന് കഴിയാത്തതെന്ന് എന്ന് പ്രത്യേക കോടതി ജഡ്ജി സുപ്രീം കോടതിക്ക് കൈമാറിയ കത്തില് വ്യക്തമാക്കിയിട്ടുണ്ട്.
