കോട്ടയം: മന്നത്തിന്റെ കാര്യത്തില് ഇടതു സര്ക്കാരിന് ഇരട്ടത്താപ്പെന്ന് എന്എസ്എസ്. സര്ക്കാരിന് ആവശ്യമുള്ളപ്പോള് മന്നത്തു പത്മനാഭനെ നവോത്ഥാന നായകനായി ഉയര്ത്തിക്കാട്ടുകയാണെന്നും അല്ലാത്തപ്പോള് അവഗണി ക്കുകയാണെന്നും ജനറല് സെക്രട്ടറി ജി. സുകുമാരന് നായര് പ്രസ്താവനയില് ആരോപിച്ചു.
എന്എസ്എസ് കെട്ടിപ്പടുത്ത്, സമുദായത്തിന്റെ പുരോഗതിയിലൂടെ സമൂഹത്തിന്റെയും രാജ്യത്തിന്റെയും നന്മയ്ക്കായി ജീവിതാവസാനംവരെ കഠിനാദ്ധ്വാനം ചെയ്ത കര്മ്മയോഗിയായിരുന്നു മന്നത്തു പത്മനാഭന്. മതേതരത്വത്തിലും ജനാധിപത്യത്തിലും ഈശ്വരവിശ്വാസത്തിലും അടിയുറച്ചുനിന്ന് സാമൂഹ്യനീതിക്കുവേണ്ടി അദ്ദേഹം എന്നും പോരാടി. അന്ധവിശ്വാസങ്ങള്ക്കും അനാചാരങ്ങള്ക്കും ദുര്വ്യയങ്ങള്ക്കും ഉച്ചനീചത്വങ്ങള്ക്കും എതിരെ എന്നും ശക്തമായ നിലപാട് സ്വീകരിച്ച സാമൂഹ്യപരിഷ്ക്കര്ത്താവും ആയിരുന്നു അദ്ദേഹം. എന്നാല്, മതപരമായ ആചാരങ്ങള്ക്കും അനുഷ്ഠാനങ്ങള്ക്കും വിശ്വാസങ്ങള്ക്കും അദ്ദേഹം ഒരിക്കലും എതിരായിരുന്നില്ല.
ചരിത്രപ്രസിദ്ധമായ വൈക്കം സത്യഗ്രഹം, ‘സവര്ണജാഥ’, ഗുരുവായൂര് സത്യാഗ്രഹം, അവര്ണ്ണരുടെ ക്ഷേത്രപ്രവേശനം തുടങ്ങിയ നവോത്ഥാനപ്രവര്ത്തനങ്ങളില് അദ്ദേഹം വഹിച്ച പങ്ക് ചരിത്രപ്രസിദ്ധമാണ്. ഗുരുവായൂര് സത്യാഗ്രഹം കേരള നവോത്ഥാനചരിത്രത്തിലെ ഒരു നാഴികക്കല്ലാണ്. ഗുരുവായൂര് സത്യാഗ്രഹക്കമ്മറ്റിയുടെയും പ്രചാരണക്കമ്മറ്റിയുടെയും നായകനായി തെരഞ്ഞെടുക്കപ്പെട്ടത് മന്നത്തുപത്മനാഭനായിരുന്നു. എന്നാല് ഗുരുവായൂര് സത്യഗ്രഹസമരസ്മാരകം നിര്മ്മിച്ച് 2018 മെയ് എട്ടിന് ഉദ്ഘാടനം ചെയ്തപ്പോള് മന്നത്തുപത്മനാഭനെ ഓര്മ്മിക്കാനോ, സ്മാരകത്തില് പേരുചേര്ക്കാനോ സര്ക്കാര് തയ്യാറാകാതിരുന്നത് അധാര്മ്മികവും ബോധപൂര്വവുമായ അവഗണനയുമാണ്.
ഇന്നത്തെ ഭരണകര്ത്താക്കള് അവര്ക്കാവശ്യമുള്ളപ്പോള് മന്നത്തുപത്മനാഭനെ നവോത്ഥാനനായകനായി ഉയര്ത്തിക്കാട്ടി അദ്ദേഹത്തിന്റെ ആരാധകരെ കൈയിലെടുക്കാന് ശ്രമിക്കുകയും അവസരം കിട്ടുമ്പോഴെല്ലാം അവഗണിക്കാന് ശ്രമിക്കുകയും ചെയ്യുന്നതിന് ഒരു ഉദാഹരണമാണ് കഴിഞ്ഞ ദിവസം ദേശാഭിമാനി പത്രത്തിന്റെ എഡിറ്റോറിയല് പേജില് വന്ന ലേഖനവും സത്യഗ്രഹസമരസ്മാരകത്തില് നിന്ന് മന്നത്തിന്റെ പേര് ഒഴിവാക്കിയ സംഭവവും. ഇടതുപക്ഷ സര്ക്കാരിന്റെ ഈ ഇരട്ടത്താപ്പുനയം നായര് സര്വീസ് സൊസൈറ്റിയും അദ്ദേഹത്തിന്റെ ആരാധകരും തിരിച്ചറിയുന്നു എന്ന കാര്യം ബന്ധപ്പെട്ടവര് ഓര്ക്കണം. ഇതിന്റെ പിന്നിലുള്ള രാഷ്ട്രീയവൈരത്തിന്റെ ഉറവിടം എന്തെന്നും എല്ലാവര്ക്കും മനസ്സിലാക്കാവുന്നതേയുള്ളുവെന്നും ജി. സുകുമാരന് നായര് പ്രസ്താവ നയില് പറഞ്ഞു.
